Footer

Pik-ap Layn: bubon ti ray-aw ken katkatawa

Salaysay ni Jobert M. Pacnis (Umuna a Paset)

NANGNGEGMON daytoy?

Lalaki: Nalpasen ti eksammo?

Babai: Wen, apay?

Lalaki: Siak koma metten ti  sungbatam…

Wenno daytoy?

Rehaska kadi?

Ta apay?

Wen, a, ta binaludmo ti pusok…

Pik-ap layn ti awagda kadagita. Daytoy ita ti aglatlatak a pagraray-awan dagiti agtutubo. No ketdin naguummongda a permi ti ariwawa ken katkatawada, namnamaem a madaman nga agbibinnatoda iti pik-ap layn. Umanay laeng a pakakantiawan ti maatiw.

Adda agkuna a kaarngi dagiti pik-ap layn dagiti burburtia. Ta pagpanunotennaka kan’ met. Saan, kuna met dagiti dadduma. Maysa kan’ laeng a klase wenno tipo ti makaray-aw a patangan dagitoy. Entertainment.

Ngem ania man ti agpayso, saan a malibak ti kinapudno nga adu unayen ti naimpluwensiaan dagitoy a pik-ap layn. Maysa ditan ni Senador Miriam Defensor Santiago. Kadagiti pakaawisanna a pasken, uray pay iti Senado, sabong metten ti dilana dagiti partuatna a pik-ap layn. Ket adu man ti marayray-aw.

Segun iti senador, maysa kano met daytoy a mangikkat iti stress. No malagip, saan a nakadar-ay iti umuna a lawas ti impeachment trial ni CJ Corona ta madmadi ti bagina a bunga ti hypertension. Isu a kas kunana, napintas met a makisabay sa uso tapno uray kaskasano, mapalag-anan ti riknana.

Pudno man met a makakulding iti rikna dagitoy a pik-ap layn. Saanka laeng a maray-aw, palag-anenna ti riknam. Pagaammotayo nga iti tunggal panagkatawatayo, adu a hormone ti palubosan ti bagitayo tapno irelaksna dagiti nairut nga ur-urat ket makariknatayo iti pannakalag-an. Nasamay ngarud dagitoy a mangpaimbag kadagiti sagubanittayo a bunga ti stress iti inaldaw-aldaw a panagbiagtayo.

Kadagiti teleserye iti telebision, kangrunaan dagiti gag shows, nakadidillaw ti kaadda payen dagitoy a pik-ap layn. Dakkel ngamin a pangawis daytoy kadagiti agbuybuya tapno tarabayenda dayta a pabuya. Siempre, no adu ti agbuya, nangato ti reytingna. No kasta, adu dagiti maawis nga agpaanunsio kadagiti produktoda. A kumitaan iti dakkel dagiti estasion ti TV. Uray payen iti radio.

Sino ti saan nga umisem iti daytoy a pik-ap layn a nangegtayo iti telebision nga inyebkas ni John Lloyd Cruz. Nagimpapatay ni Cruz tapno maawisna ti imatang ti pagduyosanna a balasang.

Madandanagan ti balasang a nagsaludsod: Is he dead?

Simmungbat ni John Lloyd Cruz: Oo, dead na dead sa ‘yo!

Kadagiti met agtutubo, aglalo kadagiti adda iti adolescent period, ania ketdin a ‘kilig’ ti ipaayna iti tunggal maysa. Saan ngarud a nakakaskasdaaw no madamagtayto laengen nga addan nagassawa gapu laeng kadagiti pik-ap layn!

Pagorasanka kadi?

Apay?

Ngamin, sika laeng ti pagrikrikusan ti lubongko…

Wenno daytoy.

Sabongka kadi?

Ta apay?

Ngamin, agadiwara ti banglom ditoy hardin ti barukongko…

Ken daytoy pay.

Pusoka kadi?

Apay?

Wen, ta agpitpitikka ditoy barukongko!

Sabali pay daytoy.

Pul-oyka kadi?

Apay ngamin?

Ngamin, ingget imnas ti aprosmo ditoy rupak!

No ni Ading Balasang ti nakaibagaanna dagita, uray man ang-angaw laeng, ayna, agkulagtit la ketdi ti pusona. Baka dina mapupuotan, iti kinalaing ni Manong Baro nga agpik-ap layn, ket masungbatanna a dagus!

(Adda tuloyna)