Piknik, nagtunged iti pannakalmes

SUYO, Ilocos Sur – Nagtunged iti liday ti naragsak a panagpipiknik dagiti agkakabagian idi Hunio 12 gapu iti pannakalmes ti maysa kadagiti sangaili iti karayan sadiay Barangay Uso, ditoy nga ili.

Nainaganan ti biktima ti pannakalmes a ni Rowell Gallebo y Saulog, 20, baro, ken residente iti Barangay Sabuanan, Sta. Lucia, Ilocos Sur.

Iti panagimbestiga dagiti polis, napan nagpipiknik ti biktima, kaduana ti pamiliana, kakabagian ken gagayyem iti Lipay Resort, a masarakan iti Sitio Lipay, Barangay Uso, idi agarup 10:00 ti nadakamat nga aldaw.

Mapapati nga idi agarup 11:00 iti dayta met laeng nga aldaw, napan ni Gallebo naglangoy iti karayan.

Nagbalaw dagiti kakadua ti biktima idi awan a makitada ti biktima iti karayan ket sinapulda daytoy

Nakitada laengen ni Gallebo nga agtaptapaw iti tengnga ti karayan.

Inalawda ti biktima sada intaray iti Tagudin General Hospital ngem indeklara ti doktor a nangtaming kenkuana nga awanen ti biagna.#