VIGAN CITY – Tapno manamnama a natibker ti maipatakder a seawall iti Barangay Mindoro ditoy, kiniddaw ni Konsehal Benjo Verzosa ti pannakapili a nasayaat iti kontratista iti pannakaipatakderna.

Iti session ti konseho itay Agosto 20, kinuna ni Verzosa a dagiti koma kontraktor a kualipikado ken  addaan iti napintas a rekord ti mapili a mangipatakder iti nasao a seawall tapno saan a nadaras a madadael.

Sakbayna, maysa a resolusion ti naidatag iti konseho ditoy a mangited iti pammalubos ken ni Mayor Eva Marie S. Medina a sumrek iti negotiated contract para iti pannakaipatakder iti seawall iti Mindoro tapno saanen a dumalan iti bidding.

Nagtaud ti pondo a P5 milion para iti pannakaipatakder ti seawall manipud iti Opisina ti Presidente.

Simmangpeten ti 50% iti naikari a pondo.

Kinuna ni Versoza nga uray bassit nga span ti maipatakder no natibker dagiti materiales a mausar, ket ad-adayo a nasaysayaat ngem iti atiddog a nadaras met a marba.

Kinuna ti konsehal a kasapulan ti nainget a panangmonitor ti engineering department ti gobierno ti siudad tapno masigurado a saan a dagiti substandard a materiales ti usaren ti agbalin a kontraktor.

 Innayonna pay nga agbalin koma a leksion ti city government  dagiti nadaras a madaddadael a seawall a naipatakder kadagiti sabali a lugar iti probinsia a saan a natibker ti pundasionna isu  a nadaras a madadael kas iti  seawall iti Santa.

Inyunay-unay pay ni Verzosa kadagiti bumarangay iti Mindoro nga isuda mismo ti mangkita iti pannakaipatakder ti seawall tapno masigurado a dagiti umno a materiales ti mausar.

Inaprobaran ti konseho ti resolusion iti maikadua ken pinal a pannakaibasana.

Maipalagip a maysa a resolusion ti inaprobaranen ti konseho a nangkiddawanna iti pinansial a tulong a sag-P5 milion kada  Gov.Deogracias Victor “DV”Savellano ken Conggressman Ronald Singson para met laeng iti pannakaipatakder ti seawall iti nasao a barangay.

Narba ti seawall gapu iti bagyo a nangdidigra iti probinsia idi napan a tawen.#