Pimmaltog iti barangay captain, nakasuan

STA, CRUZ, Ilocos Sur – Napilaan iti kaso ti suspek a nangpaltog iti maysa a barangay captain sadiay Barangay Sagat, ditoy nga ili idi rabii ti Enero 25.

Napilaan ni Pedro Pilarca aka Peter, residente iti Barangay Mambog, ditoy nga ili iti kaso a frustrated homicide, direct assault ken alarm and scandal iti Opisina ti Provincial Fiscal gapu iti panangpaltogna ken ni Sagat Barangay Captain Aurelio Bantic y Baduyen, 51,  naasawaan.

Nai-docket ti kaso iti babaen ti NPS I-03-INV-14A-00054.

Naipatulod metten iti crime laboratory iti Candon City ti narekobre a kapsula manipud iti cal. 45 a mapapati nga inaramat ni Pilarca a pinangpaltog iti biktima.

Segun iti panagimbestiga dagiti polis, sakbay ti pannakapaltog ni Bantic, namindua a nagpaputok ni Pilarca iti maysa a natayan.

Idi nagturong ni Bantic iti nadakamat a lugar, mapapati a naginnagawanda ken ni Pilarca ti paltog ti suspek.

Nagkanalbuong ti paltog ket napuntaan ti makannigid a saka ti biktima a puon ti nakadalebanna iti daga.

Mapapati a pinutokan ti suspek ti biktima ngem awanen ti bala ti paltogna.

Naitaray ni Bantic, immuna iti Sta. Lucia District Hospital sa naiyalis iti Candon City Hospital.

Naglibas ti suspek iti amianan a direksion.

Nakarekobre dagiti nagresponde a polis iti dua a kapsula manipud iti cal. 45 iti nakapasamakan ti pammaltog.

Kabayatanna, maysa a baro ti naireport a nakapaltog iti bukodna a bagi idi rabii met laeng ti Enero 25 sadiay Barangay Balugang, Burgos, Ilocos Sur.

Nainaganan ti biktima a ni Raffy John Luciano y Baclig, 26, baro, ken residente iti nadakamat a barangay.

Naammuan iti inbestigasion a sakbay ti insidente, nakapidut ni Luciano ken ti kaduana a ni Jomich Tamayo iti maysa a homemade paltik (one pong) iti asideg ti karayan iti Burgos ket panggepda nga ipaima ken ni Konsehal Rodolfo Tamayo, chairman ti municipal peace and order council.

Mapapati nga insalikad ti biktima ti paltog iti siketna iti sanguanan ket idi sakayanna ti motorsiklona, insimpana ti paltog ngem aksidente a nakalbitna ti gatilio a puon ti nagkanalbuongan daytoy ken nakatiruan ti makannawan a sakana.

Nagpatulong ni Tamayo iti police station ket intaray dagiti naka-duty a polis ni Luciano iti Judge Celestino Guerrero Memorial Hospital iti Sta. Maria, Ilocos Sur sa naiyalis iti Candon City Hospital.#