Salaysay: Pinnolitika uray panawen ti layus | Tawid News Magazine - Weekly Ilocos News 📰

Pinnolitika uray panawen ti layus

NAGNADNADEN ti layus iti kaaduan nga ili ti Cagayan nga inyeg ti Bagyo Quiel. Ita, mapaspasungadan manen ni Bagyo Ramon.

Ket nupay nagnadnaden ti layus, saan pay gayam a nagnadnad ti politika/pinnolitika. Aglaylayus dagiti binnato iti pasagid.

Apay? Nakatugawen dagiti rumbeng nga agtugaw. Ngem saan latta gayam a nagsardeng ti politika.

Iti maysa kadagiti ili a nalayus, nakakaskas-ang man a panunoten nga adda latta dagiti kailian a nabara ti panagipapanda kadagiti panagtulong a mapaspasamak. Iramutda latta daytoy iti napalabas nga eleksion.

Iti ngamin nasao nga ili iti Cagayan, nagruar dagiti kailian a naayat a tumulong kadagiti biktima ti layus. Adda dita nga impadalanda ti tulongda kadagiti am-ammoda ta makaammon dagitoy. Kayatna a sawen, saandan nga impadalan iti agdama nga administrasion.

Pagarigan laengen ti maysa a grupo dagiti umili (nga addan iti sabali a pagilian ken siudad ti pagilian) a nagpapatang lattan dagitoy iti social media. Gapu iti asida kadagiti kailianda a biktima, napagnunumuanda a mangipaayda uray sangkabassit laeng a tulong.

Tapno kano sigurado a maidanon daytoy kadagiti biktima, kinontakda dagiti batch-da nga adda iti ilida. Dagitoyen ti pinagbalinda a coordinator iti proyektoda nga itutulong. Personal nga indanon dagiti coordinators ti tulong iti evacuation center.

Saan laeng a maymaysa dagitoy a grupo. Aduda dagiti pribado nga indibidual a nanggupgop iti tulong tapno maited kadagiti biktima.

Mailadawan ngarud ditoy nga iti oras ti didigra, saan nga agbibinnay-a dagiti umili. Ammoda no ania ti nasakit ti tunggal maysa. Ammoda no ania ti kasapulan.

Ta asino met ti saan a makalbit ti riknana no maimatanganna ti nakakaasi a kasasaad dagiti kailianna? Aglalo no adda met mabalinna nga itulong?

Adu ti naragsakan itoy gapu iti awan ressatna a panagsangpet ti tulong. Adda pay nagtaud iti maysa nga estasion ti telebision.

Saan met a nagpaudi ti agdama nga administrasion dayta nga ili. Inyunana, kas maitutop, a kinita ti (kina)talged dagiti umilina. Iti tengnga ti kinarisgo ti aglawlaw idi kasta unayen ti namsaakan ti layus, impanna dagitoy kadagiti evacuation centers.

Kadagiti nagbakuitan, naipaay ti kasapulan dagiti umili kas iti taraon ken pagan-anay.

Naannayas koman ti taray ti amin. Ngem idi tumulong metten ti bangir a grupo, ti inabak ti agdama a liderato, ditan a rimsua dagiti adu a negatibo a saosao.

Kasla kinuton dagiti supporters ti agdama a liderato. Aglalaoken ti parparuarenda iti social media. Agpolpolitika kano manen ti bangir.

Ti itutulong, awan rupana. Maseknan ti amin. Nalpasen ti basingkawel, saan koman nga ikkan pay iti maris no tumulong ti maysa a tao. Saan a daytay perdien daytoy tapno saan nga agbalin a nabanglo kadagiti umili.

Dayta paruaren a kasla in-insultuen ti naabak a grupo ti agdama nga administrasion iti impaaynan a tulong, kasla awan makita a logic daytoy.

Tumulong ti maysa a tao ta dayta ti mariknana. No marisan daytoy iti politika, nasapa pay a sawen manen dayta ta kalkalpas la ngarud ti eleksion.

Wenno iladawan daytoy ti amak dagiti supporters a mabalin a matippuog ti amoda no agtultuloy ti ibabanglo ti bangir a grupo? Ngem no agpayso nga inannong met ti amoda ti akemna, apay koma nga agdanagda?

Idi pay, medio nabaran dagitoy a supporters. Aglalaok ti patataudenda nga isyu iti kalabanda a dina pay pulos napadasan ti nagtakem. Baro a rupa iti politika, kasta laeng ti kalabanda.

Bay-anda latta koman dagiti umili a mangrikna no ania ti pudno iti itutulong ti bangir a grupo. Marikna met ti sinseridad ti asino man. Saan a dayta marisan iti politika.

Ti didigra iti biag, nagalas man a marisan pay iti politika. Bay-an latta koman ti tunggal maysa a mangiburay iti tulongna.

Saan a padaksen.

Kadagiti met tumultulong, saan koma a kasla yun-una pay dayta panagpaala iti ladawan tapno adda laeng iposte iti social media. Bay-an a dagiti sabali nga indibidual wenno umili ti mangaramid iti dayta. Saan nga iti bukod a kampo.

Ta imbes nga agbalin a nasayaat ti itutulong, baka panunoten pay dagiti makakita iti post a pagparammag laeng daytoy nga aramid.

Iti panawen ti didigra, naimbag la unay daytoy ilulutuad ti espiritu ti panagsisinnaranay. Ngem rumbeng koma a liklikan ti panangmaris pay daytoy iti sabali. ●