Piskal ti Bangued, nasarakan a bangkay

VIGAN CITY – Nasarakan a bangkayen ti maysa a piskal iti likudan ti balayna sadiay Barangay Tamag ditoy siudad idi agsapa ti Abril 8.

Mapapati a kinettel ni Benigno Peralta Alvarado, 52, naasawaan, piskal iti Opisina ti Provincial Prosecutor, Bangued, Abra, ti bagina gapu iti maysa a suicide note a nasarakan dagiti inbestigador iti bulsa ti short pantna.

Idi naipakita ti suicide note ken ni Natividad nga asawana, kinuna daytoy a surat ti lakayna.

Segun iti polis, nasarakan a nakapakleb ti bangkay ni Peralta, nagsagrap iti sugat iti barukongna, babaen ti maysa a Redencio Ponce y Fernandez, 59, residente iti Barangay Puro, Caoayan, Ilocos Sur, kabagian ti asawa ti biktima.

Immian da Ponce iti balay ti biktima ta adda dar-ayanda a kasar iti dayta nga aldaw.
Uray ni Peralta, mapapati a naggawid iti malem ti Abril 7 tapno tumabuno met iti nasao a kasar.

Kas maibatay iti inisial a panagimbestiga ti Vigan police, mapapati a nakangeg ni Ponce iti maysa a putok a naggapu iti asideg ti balay ti biktima iti nagbaetan ti 4:30 ken agarup 5:50 ti agsapa ti Abril 8.

Idi rimmuar ni Ponce iti agsapa, nakitana laengen ti biktima a nadigos iti dara iti likud ti balay.

Nakarekobre dagiti inbestigador iti asideg ti bangkay ti maysa a pistol Colt .45 caliber nga addaan iti magasin a nagkarga iti uppat a bala, maysa a naiputok a cartridge case para .45 cal., maysa a live ammunition para .45 cal., maysa a deformed a naiputok nga slug, ken maysa a Samsung cellular phone a mapapati a kukua ti biktima.

Segun iti asawa ti biktima, saan a makaturturog ti piskal sumagmamano nga aldaw sakbayna.

Iti follow-up investigation ti kapolisan, naammuan a nagkonsulta pay ni Peralta iti doktorda. Saan pay nga ammo no ania ti inkonsultana.

Kasta met a saan pay nga impalgak ti kapolisan no ania ti linaon ti mapapati a suicide note ken no adda pakainaiganna iti trabahona kas piskal.#