Piso mo, sampung libo, nairusat

CANDON CITY – Inyussuat ti Philippine Army ti programa a “Piso mo, Sampung Libo” tapno maallukoy dagiti bumarangay a makipagmaymaysa iti programa ti gobierno kontra insurhensia.

Daytoy ti kinuna ni Lt. Aurelio Kigis, agdama a Civil Military Operation Officer ti 50th Infantry Battallion bayat iti programada nga Oras ti Soldado iti DZTP Radio Tirad Pass  idinto nga innayonna a mabalin dagiti umili ti agi-text iti aniaman nga impormasion mainaig kadagiti kameng ti New People’s Army.

Inlawlawag ni Lt. Kigis a babaen ti nasao a programa, maikkan iti gunggona dagiti umili a makaited iti aniaman nga impormasion mainaig kadagiti kameng ti New Peoples Army babaen iti text messages.

Kinunana nga iberipikada amin a text message ket no positibo ti mensahe, maited ti P10,000 iti nangipatulod iti nasao a mensahe.

“Saan a bayad iti aniaman nga impormasion nga ipaay dagiti umili no di ket  panagyaman ken kas pangliwliwa gapu iti tured ken anusda a nangi-text kadakami,”  kinuna ni Kigis.#