PITIK: Adu ti apit, ngem problema ti paglakuan ni mannalon

Inkari ni Agriculture Secretary Arthur Yap nga ikadkadakkelna ti volume ti irik a gatangen ti National Food Authority manipud kadagiti mannalon iti daytoy a panagaani.

Segun iti sekretario, saan laengen a 500,000 metric tons nga irik ti gatangen ti NFA kadagiti mannalon no di agbalinen a maysa a milion metric tons.

Medio makaparagsak daytoy a waragawag ni Yap agsipud ta tinawen a problema dagiti mannalon ti pangilakuanda kadagiti maapitda.

Medio, makunami, agsipud ta mayarig daytoy iti sapsapo a mangted laeng iti apagapaman a bang-ar kadagiti mannalon ngem saanna a magudilan nga agasan ti agdama a problemada.

Agpayso, naruay dagiti traders nga aggatgatang kadagiti apit dagiti mannalon a irik ngem nababa ti presioda iti sanguanan ti ngumatngato a magastos dagitoy iti ganagan, pestisidio ken dadduma pay a kasapulan ti mulana tapno dumakkel ti maapitna.

Sumangkautro, limitado met ti gatangen ti NFA nga irik ta  agpatingga laeng iti 500,000 metric tons.

Kinuna ti Abono party list a pagkamengan dagiti nasurok 400,000 a mannalon, iti 500,000 a puntiria a gatangen ti NFA nga irik, agdagup laeng daytoy iti lima porsiento iti kadagupan ti manamnama nga apiten dagiti mannalon a 9.82 million metric tons nga irik manipud iti Oktubre agingga iti Disiembre.

Ita, inkari ni Sec. Yap nga ikadakkelna ti volume ti irik a gatangen ti NFA manipud iti 500,000 iti maysa a milion a metric tons. Ngem umdas kadi daytoy?

Iti biang ti Abono,  nasayaat daytoy nga addang ti sekretario ti Agrikultura, ngem sangkaballing unay agsipud iti kadakkel ti manamnama a maapit dagiti mannalon.

“No gumatang laeng ti NFA iti maysa a milion a metriko tonelada nga irik, ania ti mapasamak iti nabati a maapit nga agdagup iti nasurok walo million a metric tons?”  saludsod ti Abono.

Iti biangmi, saanen a kasapulan a sungbatan dayta ni Sekretario Yap agsipud ta uray nababa laeng ti adalna, ammona ti mapasamak no kasta nga iti baet ti kaadu ti suplay nga irik ngem bassit met ti gatangen ti NFA. Iti daytoy a situasion, kapilitan nga ikidem ni mannalon a mapan ilako ti irikna iti nababa a presio kadagiti mananggundaway a komersial a negosiante. 

Iti biang ti Abono, kasapulan a gumatang ti NFA iti saan a nakurkurang ngem 2.5 metric tons nga irik tapno mapalag-anan dagiti mannalon.

Mangnamnama pay ti Abono a denggen ni Yap daytoy a  saning-i dagiti mannalon.

Ngem iti biangmi, ad-adda a paborkami iti demanda ni Sen. Escudero a marebio ti sistema ti panaggatang ti NFA tapno mapudasdasan no apay a bassit laeng ti volume nga intuding daytoy nga ahensia a  gatangen kadagiti mannalon.

Paborkami pay iti addang ni Sen. Escudero a pagpalawagenna ti NFA no apay nga agang-angkat iti nagdakkel a volume ti bagas manipud iti Thailand ken Vietnam idinto nga adda met nasurok a walo million a metric tons nga irik nga apit dagiti mannalon ditoy pagilian a nakasagana nga ilakoda.

Saludsod: apay nga agangkat ti maysa a pagilian iti bagas idinto nga adu ti apit dagiti mannalon nga irik?


O