PITIK: Agkandidatoka? Agpanunotka a nalaing, kailian-2

No awan ti nabileg a ramutmo iti politika, saanmon a gandaten ti agkandidato, kailian, nangruna no adda dinastia iti pagkandidatuam. Kaarigmo laeng ti mangitubtob iti ulom iti napuskol a pader.

Ditoy pagilian, kapaliiwan nga ad-adu nga amang dagiti mangabak iti eleksion gapu iti kuarta, personalidad ken relasion, saan a gapu iti plataporma. Saan a mabilang iti ramay dagiti nangabak iti eleksion gapu ta anak, asawa, kabsat, kabit wenno ania ditan a relasion, ti addaan kuarta, nalatak a nagan ken langilangan a politiko. Dayta ti gapuna nga adda makunkuna a dinastia ti politika ditoy pagiliantayo agsipud ta pagsisinnublatan ti maymaysa a pamilia ti rienda ti turay, iti man nasional a posision wenno kadagiti probinsia, siudad wenno il-ili.

Mangdakamattayo iti sumagmamano. Kas ken ni Pres. Gloria Macapagal-Arroyo, amana daydi nag-Presidente Diosdado Macapagal. Ita, diputado ti dua nga anakda ken ni Mike Arroyo, da Dato ken Mikey Arroyo. Diputado metten ti kabsat ni Mike Arroyo a ni Iggy.

Ni napadisi a Presidente Joseph Estrada, napagbalinna a senadora ti asawana a ni Dr. Loi Ejercito. No ar-arigen, saan unay nga am-ammo ti publiko ni Dr. Ejercito. Ti la ammo ti tattao, isu ti pudpudno nga asawa ni Estrada. Ngem idi napadisi ni Estrada iti tugawna a kas Presidente, kimmandidato (wenno napilpilit a nagtaray) ti doktora ket nangabak.

Simmublat met ni Jinggoy Estrada, anak ni Joseph ken ni Dr. Loi, a nagkandidato a para senador ket nangabak. Naimbag ta saanen a nagpailayon ni Dr. Loida ta di koma adda agina nga agludon iti Senado.

Sakbay ti panagsenador ni Jinggoy, nagmayor iti San Juan. Ita, sinublat met ti anak ni Joseph iti sabali a babai ti rienda ti turay ti San Juan kas mayor.

Madakamat pay ditoy dagiti agkabsat a senador, da Pia ken Allan Peter Cayetano. Maipalagip a nag-senador met ti amada, ni Renato Cayetano, a nalatak iti birngasna a “Companyero”.

Ni Sen. Manny Villar, asawana ti mangibagi iti La Pinas, ni Cynthia Villar.

Uray ni Sen. Rodolfo Biazon, diputado met ti anakna, ni Ruffy, a mangibagi iti Muntinlupa.

Ni nag-bise presidente Teofisto Guingona, Jr., adda met diputado nga anakna, ni Teofisto III, a mangibagi iti maikadua a distrito ti Bukidnon.

Ni Senate President Juan Ponce Enrile, adda anakna a diputado a mangibagi iti maikadua a distrito ti Cagayan.

Uray ni Sen. Francis Escudero, ti amana ti diputado iti Sorsogon.

Iti nasional a tukad daytoy, kailian. Nakarkaro manen no agpababaka. No mapantayo kadagiti probinsia, siudad, il-ili, makitatayo a kaadduan kadagiti nakatugaw a diputado, gobernador, bise gobernador, bokal, mayor, bise mayor, konsehal ket maymaysa a pamilia ti nagtaudanda, mabalin nga asawa, anak, ama, uliteg, ikit wenno ania ditan a relasion. Kayariganna daytoy ti bukel nga intukit dagiti nagkauna a kaputotanda, dimmakkel, rimmangpaya, nagbunga ket iti pannakaitukit iti ad-adu a bukel, awanen ti iti-itan dagiti sabali pay a kayo a dumakkel ken agsalumpayak.

Kasta ti agdama a buya iti politika iti pagilian.

No agkandidatoka a saanka a nagtagiramut iti kas kauneg ken kalawa a kas kadakuada, agpanunotka a nalaing, kailian.

Agpayso, nangato ti arapaapmo para iti pagsayaatan ti kalugaram wenno kailiam. Agpayso, nadarisay ti panggepmo nga agserbi para kadakuada. Ngem saan nga umdas dagita tapno matungpalmo ti arapaapmo. Adu dagiti lapped kenka.

Ita, ituloymo pay kadi ti panggepmo nga agkandidato iti masungad nga eleksion?#