PITIK: Agkandidatoka? Agpanunotka a nalaing, kailian-3

No agkandidatoka iti maysa a puesto, adu dagiti masapul a sursuruem nga ipakat ken aramiden tapno makaawiska iti agbutos kenka.

No iti kallabes, naikayka kadagiti tattao, sursuruem itan ti umasideg kadakuada, umisem ken kumablaaw, tumapik wenno sumallabay, makilangsot ken makirinnabak.

Nasken nga aramidem daytoy ta dakkel ti kaipapanan ken ni Pinoy ti makadakulap, makapatangda uray apagkanito, makainnisem wenno makikinnablaawda ni kandidato. Narabaw ti raragsakan ni botante a Pinoy. Masirayanna laeng wenno mataldiapanna laeng apagbiit ni kandidato, naragsaken nga aggawid a mangipadamag kadagiti kaarrubana ti kapadasanna.

Ngem iti daytoy a pannakilangenmo kadagiti tattao, masapul nga ipakitam nga awan panaginkukunam, nga awan ti pannakadurmen wenno panagalikakam nga umasideg kadakuada. Sensitibo dagiti umili, nangnangruna dagiti marigrigat wenno sangkabirokan-sangkaapuyan.

Maysa a kandidata ditoy probinsia ti nadamagmi idi a nailupek iti panagpailayonna agsipud ta nakita dagiti bumarangay a saan gayam a naimpusuan ti pannakilangen daytoy a kandidata kadakuada.

Kastoy nay, kailian. Idi damona ti nagkandidata, numero uno daytoy iti kinakonsehal gapu ta malaksid ta adda pamuyaanna, naasideg kadagiti tattao ken napintas dagiti gannuat nga imbagana nga aramiden no isu ti mangabak.

Ngem iti daytoy a panagpailayonna, dakkel ti nagbaliwan daytoy nga opisial. Agpayso, naisem no makilamano, makibinneso ken umarakup kadagiti tattao, nangruna kadagiti inna, ngem no lumuganen iti kotsena, ayabanna ti sekretariana, pairuarna ti alkohol sana bugguan ti imana. Ti makadakes, nakita ti dua a bumarangay. Nagwaras dayta nga inaramidna. Iti dayta nga eleksion, addan iti kutit!

Sursuruem pay, kailian, nga arkosan ti bitlam. Daytay natagapulotan a kuna. Dagiti dadduma, ikarida uray dagiti bituen ken bulan para “kuno” iti pagimbagan dagiti kalugaranna. No masirib dagiti botante, ammoda no patpatiray-ok laeng dagiti balikasmo. Ngem ti imasna, no nalaingka a bumuladas, makaay-ayo ti panagbitlam, adu la ketdi ti mapamatim iti kinapudno ti ibagbagam, uray no kagudua laeng ti pudno.

No adda dagiti pagbitlaam, nasken pay nga ammom ti agsala, agkanta wenno agdaniw, agdallot wenno ania ditan a pangray-aw kadagiti agdengngeg. Isu a dagiti dadduma a kandidato, mangikuyogda iti artista wenno dagiti lokal a kumakanta tapno adda pangawis kadagiti tattao nga umay agdengngeg. Ngem kangrunaanna, agbalinka met nga artista, madadaan a mangray-aw kadagiti tattao tapno malipatanda uray apagapaman ti rigat a sagsagabaenda.

Kangrunaanna, saanmo nga itulok a malamangannaka ti kabalubalmo iti politika. Mangiwayatka iti surbey tapno maammuam no ania a lugar ti pagpigsaam ken pagkapsutam. Kadagiti lugar a pagkapsutam, kasapulan ti “emerhensia a wagas” tapno mapagballasiwmo dagiti botante nga agbutos kenka. Ditoy ti pakasapulam iti dakkel a pundo. Masapul ti ad-adu a papetpet kadagiti lidermo tapno agpasiarda a mangikampania kenka kadagiti tattao. Ti maysa a langilangan a politiko, iti bisperas ti eleksion, pagkutienna dagiti liderna a mangallukoy kadagiti agwaliwali a botante tapno agbutosda a pabor kenkuana. Masapul a sarunuem ida a “karadapen” dagita a botante. Sinnikapan ti magna ngem kuarta ti kasapulam. Nangruna ita ta poll automation ti mausaren iti eleksion. Ipindot laengen ni botante ti nagan ti butosanna.

Kabaelam nga aramiden dagitoy? No wen, kunam, sige, agkandidatoka. Ngem no dimo mairusok, kailian, iwalinmo laengen ti arapaapmo nga agkandidato.

Mabalinmo met ti agserbi kadagiti kailiam uray saanka a politiko, saan kadi?#