PITIK: Agkandidatoka? Agpanunotka a nalaing, kailian

Ditoy pagiliantayo, adu dagiti makabael koma a mangiggem iti rienda ti turay ngem awan ti tiansada a mangabak. Ngamin iti klase ti politika iti pagiliantayo, kasla agdalan iti abut ti dagum dagitoy tapno mangabakda iti politika nupay ikutda amin dagiti saguday ti maysa a nalaing a public servant.

Adu ti makagapu no apay a kayariganna ti agkalay-at iti narangkis a bantay tapno laeng makapangal iti tuktok ti politika.

Umuna, kasapulanna ti dakkel a pirak a busbosenna iti panagkandidatona. Kasapulanna ti dakkel a pondo a pangtangdanna kadagiti mangimaton iti kampaniana, dagiti koordinador kadagiti nadumaduma a probinsia wenno ili-ili a mangilako kenkuana a kas kandidato, dagiti bataanna a kumuyog kenkuana a mangisagana iti lugar a papananna pagkampaniaan. Kasapulanna pay dagiti para pigket kadagiti polietos, stickers ken agikabit kadagiti streamers. Nangruna, kasapulanna ti dakkel a pondo para kadagiti anunsio iti radio, cable ken telebision.

Kas ken ni Sen. Manny Villar a nangibataden iti panagkandidatona a para presidente iti pagilian, inannugotna a tapno mangabak iti eleksion, minilmilion ti kasapulan a gastuenna. Saan a maibarengbareng laeng daytoy a kinunana. Pammaneknek a kasapulan ti maysa a kandidato ti adu a pirak, dakamatentayo nga ehemplo dagiti informercials dagiti agtuturaytayo ken dagiti opisial nga adda panggepna nga agkandidato iti nasional a posision iti masungad nga eleksion.

Dakamatentayo ditoy dagiti Cabinet members nga addaan iti infomercials: ni TESDA director general Augusto Syjuco, PAGCOR chairman Efraim Genuino, DOH Secretary Francisco Duque, Metropolitan MMDA chairman Bayani Fernando, DepEd Secretary Jesli Lapuz, DPWH Secretary Hermogenes Ebdane, DAR Secretary Nasser Pangandaman, DILG Secretary Ronaldo Puno ken Defense Secretary Gilbert Teodoro Jr.

No patien ni Sen. Miriam Santiago, nakabusbos dagiti Cabinet members iti P218 milion para kadagiti infomercials nga agdadata a pangipromot iti nagan ken gapuananda.

Ngem di malibak, kasapulan dagiti anunsio kas iti infomercial tapno maawis ti adda panggepna nga agkandidato ti imatang dagiti botante ken tapno maikur-it iti panunot dagiti tattao ti rupa ken naganna. Dagiti dadduma a politiko, adda listaanda kadagiti nadumaduma a piesta iti pagilian. Kas ditoy Vigan City, idi Longganisa Festival, adda dagiti naiwaras a paid a nakaipintaan ti umis-isem a rupa ti maysa a politiko nga adda ambisionna nga agpresidente. Sabali pay dagiti streamers a naibartay kadagiti kalkalsada a mangkabkablaaw kadagiti taga-Vigan iti naragsak a panagpiestada. Dagiti dadduma pay nga opisial ti turay, makitam ti nagan ken rupada a naimarka kadagiti billboards a mangibagbaga iti panangsurot iti trapiko wenno mangibambando iti maysa a proyekto a kasla ketdin nagtaud kadakuada ti pondo a nabusbos iti pannakaaramidda. Uray pay dagiti pader, maipinta ti naganda kadagiti nalayang a disso a nalawag a mabasa dagiti lumabas. Iti napalabas nga eleksion, namurumoran iti nagan ti kandidato uray dagiti bakras ti bantay no sumang-atka iti Baguio City. Ditoy Ilocos Sur, agkaiwara dagiti karatula a mailansa kadagiti poste, puon ti kayo, kadagiti diding dagiti balbalay, alad ken uray ania ditan a lugar nga ayuyang dagiti tattao. Diak nalapdan ti di nagsanamtek a nakakita iti napaguurnos a polieto a mangibando iti nagan ti maysa a lokal a kandidato iti bakrang ti view deck iti zigzag road iti Banaoang. Uray ita, nalawag pay la a mabasa ti nagan daytoy a kandidato ta saan a nakuskosan ti nakaipagketan dagiti polieto.

Wen, kasapulan ti pondo, dakkel a pirak, para kadagitoy. Ket no awan ti kuartam, uray no siribmo amin a sirib, uray kabaelam amin a kabaelan, saankan nga agarapaap, kailian, ta mailugeska laeng iti eleksion.

(Adda tuloyna)