PITIK: Angaw a makasugat iti rikna (Umuna iti dua a paset)

ITAY NABIIT, maysa a nalatak a Holywood star ti nangiyangaw iti maysa a talk show, ti “Late Show with David Letterman”, a kayatna ti makaputot iti adu ket mangala iti Pilipina wenno Russian nga agbalin a mail-order bridena.I

“I love to have more kids. I think about getting a Filipina mail-order bride or a Russian one. I’m 51,” dagitoy ti imbalikas ni Alec Baldwin ken ni Letterman.

Mabalin nga angaw laeng dayta ken ni actor Alec Baldwin ngem saan a nasayaat ti panagsaadna kadagiti rinibribu a Filipino, nangruna dagiti babbai, a nakangeg iti imbalikasna iti nasao a talk show.

Ken ni Sen. Loren Legarda, “tasteless, chauvinist ken racist” ti angaw ni Baldwin sana imbatad a saan a para lako dagiti babbai a Filipino, uray pay ken ni Baldwin a nalatak nga aktor.

Kinuna pay ni Legarda a saan koma a trataren dagiti babbai a kasla tagilako a mabalin lattan nga iyorder kas iti fastfood stores wenno maysa nga aruaten nga ipalladaw lattan no naumaanen ti akin-aruat.

Kinuna met ni Akbayan Rep. Risa Hontiveros nga opensibo ti balikas ni Baldwin ket maysa daytoy nga insulto kadagiti babbai a nagbalin a biktima ti panagabuso a seksual ken prosti-tusion.

“Maysa daytoy a panangbastos kadagiti babbai,” kinuna ni Hontiveros idinto nga innayonna a saan nga umanay ti panagpadispensar ni Baldwin kas indagadag ni Sen. Legarda no di masapul a masursuruan ti aktor mainaig iti nakapay-an dagiti biktima ti mail-order bride nga iskema a nakaikursongan dagiti kailiantayo a babbai iti kallabes.

Madakamattayo ditoy nga adda daydi panawen nga adu a babbai ditoy pagiliantayo ti nakapan iti sabali a pagilian babaen ti mail-order bride nga iskema ti panagrekrutan.

Pagpammarangen ti maysa a recruiting agency ti ipatulodna a trabahador a fiancee wenno asawaen ti maysa a ganggannaet. Ngem mapan laeng agtrabaho daytoy iti pagilian a papananna.

Ti rigatna iti daytoy a wagas, nagtungpal iti pannakaabuso dagiti Filipina a trabahador ta pagduaduaan no ania a klase a trabaho ti agur-uray kadakuada. Ti makadakes, nagtinnag dagiti kailiantayo a narekrut iti kastoy a wagas a para liwliwa dagiti kustomer kadagiti pasdek-pagraragsakan wenno nagbalin a kalapati a nababa ti tayabda.

Dayta ti gapuna a naputar ti R.A. 6955 wenno Anti-Mail Order Bride Law tapno mapukaw daytoy nga illegal a panagrekrut kadagiti kailiantayo a babbai.

Ngem sabali gayam ti imbatina a ladawan dagiti babbaitayo iti mata dagiti ganggannaet a kas ken ni actor Baldwin. Kas iti aktor, iti panunotda, adda pay laeng dagiti babbai ditoy pagiliantayo a mabalin lattan nga orderan wenno kasla tagilako a magatang nga agbalin nga ay-ayam ken pagderrepan.

Ngem uray iti napalabas, addan dagiti naibalikas wenno naipabuya iti telebision a nakauyawan dagiti kailiantayo a babbai.

Malagipmi la ket ngarud dagiti immun-una a nabuybuyatayo iti telebision a nakauyawan dagiti Filipino kangrunaan dagiti babbai ditoy pagilian.

Kas iti nabuyatayo a babaonen a Filipina a pinagsalasala ti maysa nga Amerikano iti sanguananna tapno maray-aw laeng. Ken ti imbalikas ti maysa a gangannaet a kolumnista a pagilian dagiti adipen ti Filipinas.

Makaparasuk iti rikna dagitoy a mabuya ken mangegtayo iti telebision.

Kaarigna maysa a tungpa iti kinataotayo a Filipino.

(Adda tuloyna)