PITIK: Ania ti Klasem a Gayyem? (Tuloyna)

Ngem idi napadisi ni Marcos iti tugawna, nagsitakias dagiti impagarupna a gagayyemna. Tinalawanda iti tiempo nga addada koma iti abayna a sumaranay.

Idi pimmanaw da Marcos iti Malakaniang, sumagmamano laeng dagiti simmurot kadakuada. Kaadduanna kadagiti gagayyemna ti nagpakni tapno dida mairamraman a dalapusen ti allawig a nangiwallages iti apoda.

Saan a “pudno a gagayyem” dagitoy nga imbilang ni Marcos a gagayyem.

Mabalin nga ikalintegan dagitoy a “gagayyemna” a tinalawanda ti bapor agsipud ta agirigen kadagiti mapapati a rinuker nga aramid ken panagabuso dagiti dadduma nga umar-arubayan ken ni Marcos. Wenno ibagada a nakitada ti “lawag” kalpasan ti nawatiwat a “sipnget”.

Mabalin nga agpayso ti ibagbagada. Ngem ad-adda a patien nga inkalakagda ti bukodda a karadkad ken pannakaisalakan iti itatakiasda iti tiempo a kasapulan ni Marcos ti suportada.

Saan met a mailibak a kaadduan kadagiti adda iti arubayan idi ni Marcos ti naggaarak iti paraangan iti administrasion a simmublat kenkuana.

Kaadduanna kadagitoy a gagayyem idi ni Marcos ti in-inut a nagsubli iti turay ken bileg iti babaen ti administrasion ni Aquino.

Saan ngarud a nakakaskasdaaw ti kinuna ti maysa a kritiko: “Isu met la nga isu.”

Ket daytoy ti mapaliiw a kangrunaan a gapu no apay a napaay ti pudno a panggep ti Edsa Revolution ken uray ti simmaruno a sabali pay a rebolusion dagiti tattao a nakapadisian met ni nag-Presidente Joseph Estrada.

Kastoy met ti makuna ni Solomon: “Ti gayyem a gatangem iti sagut, magatangdanto met kenka.”

Adda met dagiti kakastoy a gayyem. Iti ayatda laeng a makita nga adu ti makuna a gagayyemda, nalukay ti dakulapda nga agparabur. Bumbumsog dagiti “gagayyemda” kadagiti agtaud iti bulsa ken turayna.

Saantayon nga iyadayo ti imatangtayo. Adda laeng iti asideg ti kadakkelan nga ehemplo iti daytoy a pagsasao.

Iti administrasion ni Pres. Gloria Macapagal-Arroyo, kangrunaan nga alegasion dagiti kritiko ti panangpunnona iti turayna kadagiti opisial nga adda mapapati nga adda pakainaiganda iti panangabakna iti eleksion ken iti pannakasalba ti turayna idi inarigengen dagiti alegasion ti panagsuitik ken anomalia a maipagarup a nakaisawsawan ti pamiliana.

“Payback time,” kuna dagiti kritiko.

Agpayso man wenno saan, narukop ti pondasion ti kastoy a langenlangen.

Annugoten man wenno saan ti agdama a turay ngen saan a nalagda ti kasta a gayyem. Ta no makasarak dagitoy iti sabali a “naluklukay” ti dakulapna, panawandanto la ketdi ti immuna ket aglangoyda a mapan iti naud-udi. Wenno saan, no makitada a mangrugin nga lumned ti bapor gapu iti kadagsen dagiti naglugan, tumapuakda sada aglangoy a mapan iti sabali a bapor a yan ti pakaisalakanan.

Kinuna pay ti sabali a masirib: “Dagiti balangkantis a gagayyem, dakdakes ngem dagiti agdadata nga agkabusor.

Apay a masao a kasta? Wen ta no ammom nga agkabusorkayo iti maysa a tao, ammom ti pagsasaadam, ammom ti liklikam. Ngem sabalin a banag iti biang ti maysa a tao nga imbilangmo a gayyem ngem saannaka gayam a gayyem iti pudpudno a kaipapanan dayta a balikas, gayyemnaka laeng ta adda masapulna kenka. Asideg kenka ta makatulong kadagiti pagkuranganna iti biag. Ngem iti bassit laeng a krisis, saannaka a maitakderan idinto a rumbeng koma a tumulong; agtaltalekka kenkuana ngem iti liklikudam, adu gayam ti pakababalawam. Daytoy a klase ti gayyem ti kadaksan. Maysa a traidor a saan a mapagtalkan. Kaarigna ni Hudas a mangilako kenka iti tallupulo a balitok tapno laeng maital-o ti bukodna nga interes ken pagimbagan. Mabalin pay ketdi a makunam: naim-imbag pay koma a dikam naggayyem.

Ngem kasta ti biag. No adda masarakam a gayyem, ad-adu dagiti mapukawmo a mabalin pay nga agbalin a kangrunaan a kritikom kadagiti gannuatmo.

Denggentayo ngarud ti inkur-it ti sabali pay a masirib: “Piliem a siaannad dagiti gagayyemmo tapno maaddaanka kadagiti napili a gagayyem.”#