PITIK: Awan ti linteg a mangiparit iti Presidente nga agkandidato iti nababbaba a puesto

Inlawlawag pay ni Jimenez a saan a kasapulan nga aglusulos ni Pres. Arroyo iti puestona kalpasan ti panangipilana iti kandidaturana kas congresswoman.

“Nalawag ti linteg. Mapalubosan dagiti nabutosan nga opisial nga agsubli iti puesto nga ok-okuparanda kalpasan ti panaggibus ti elektoral a proseso no maabakda” idinto nga inyunay-unayna a dagiti laeng nadutokan nga opisial ipso facto ti maibilang a naglusulosen iti kanito nga ipilada ti COCda.

Segun ken ni Jimenez, saan a mangiyetnag ti Comelec iti pangngeddeng no madawat iti poll body ti panaglusulos ni Pres. Arroyo kalpasan ti panangipilana ti kandidaturana kas congresswoman agsipud ta saanda kano a “hurisdiksion”.

Iti ababa a pannao, kalpasan ti panangipilana iti COCna kas congresswoman, agtultuloy ti panangannong ni Pres. Arroyo kadagiti pagrebbenganna kas pangulo ti pagilian.

Ngem no adda man dagiti nangipeksa iti kapanunotanda nga adda kalintegan ni Pres. Arroyo ken awan ti salungasingenna a linteg no agkandidato a para congresswoman iti maikadua a distrito ti Pampanga, ad-adu nga amang dagiti naibato kenkuana a pammabalaw ken panangkondenar.

Maysa a kapigsaan iti panangkondenar ti militante a Bagong Alyansang Makabayan (Bayan).

Kinuna ni Bayan secretary-general Renato Reyes Jr. a maysa a tungpa iti rupa dagiti adu a biktima ti administrasion ni Pres. Arroyo ti panagtarayna iti Kongreso idinto nga imbatadna a pammaneknek ti panagtarayna kas Congresswoman tapno makatun-oy iti pangtimbengna a politikal ken malisianna ti akauntabilidad gapu kadagiti adu a krimen a naaramid ti turayna.

Innayon pay ni Reyes a saanen a moral a kualipikado ni Arroyo agsipud ta iti siam a tawenna iti Malakaniang, namirit iti korapsion nga awan met ti nadusa.

Ken ni Cibac Partylist Representative Joel Villanueva, kadakkelan a rabrabak iti historia ti politika ti pagilian ti panagkandidato ni Pres. Gloria Arroyo iti nababbaba a puesto a “mangibati iti dakes a raman iti ngiwat.”

Iti biang ni nag-Presidente Joseph Estrada, “maysa nga agdadata a gandat nga agtalinaed iti turay iti agnanayon” ti panagtaray ni Pres. Arroyo a mangibagi iti maikadua a distrito ti Pampanga.

Maipalagip a napadisi idi 2001 ni Estrada gapu iti naisaklang nga impeachment maikontra kenkuana gapu iti mapapati a panagpasuksok ken payola iti hueteng ket ni Arroyo ti simmukat kenkuana. Nakedngan ni Estrada a nakabasol iti plunder ngem inikkan ni Pres. Arroyo iti presidential pardon.

Nangipila metten ni Estrada iti kandidaturana para kina-Presidente iti baet ti kaadda met dagiti alegasion a saan a mabalin nga agkandidato.

Kinuna met ti Comelec nga awan ti makitada iti linteg a mangiparit ken ni Estrada nga agtaray para Presidente agsipud ta saan met a nakatugaw a Presidente nga agpailayon.

Kinuna ni dati a Presidente Fidel Ramos a saan a patas ti rupak no saan nga aglusulos ni Pres. Arroyo iti puestona iti panagkandidatona a kas congresswoman iti maikadua a distrito ti Pampanga.

Uray dagiti kandidato para presidente, saanda a kinanunongan ti panagkandidato ni Pres. Arroyo iti Kongreso.

Iti sabali a bangir, kinuna ni senatorial candidate Franklin Drilon a bay-anda lattan nga agtaray ni Pres. Arroyo agsipud ta awan ti lapped iti kandidaturana nupay saan koman nga agpapili iti sabali a pabutosan a puesto.

Kinuna ni Drilon nga agdadata a ti motibo ti panagtaray ti Presidente iti Kongreso ket tapno protektaranna ti bagina ken ti pamiliana kadagiti kaso.

Iti sabali a bangir, nagasang dagiti balikas ni Lingayen-Dagupan Archbishop Emeritus Oscar Cruz a naiturong ken ni Pres. Arroyo iti daytoy a panagkandidatona iti Kongreso: “Ipakpakitana ti pannakairaremna iti bileg, iparparangarangna ti kaawan ti propriedadna ken nakatuon ti imatangna iti Cha-Cha – ket no mabutosan – puntiriana ti Opisina ti Prime Minister”.

Indagadag met ni outgoing Catholic Bishops’ Conference of the Philippines (CBCP) Presidente Archbishop Angel Lagdameo nga ited koman ni Pres. Arroyo kadagiti sabali ti gundaway nga agserbi iti gobierno yantangay nakapagserbi metten iti kangatuan a posision.

“Saan koma a paitulok iti sulisog ti turay,” kinuna ni Lagdameo.

Sumagmamano laeng dagiti nadakamat iti ngato a panangkondenar ken pammabalaw. Ngem ti saludsod: denggen kadi ida ni Pres. Arroyo?

Ngem pammaneknek laeng ti panagkandidato ti maysa a nakatugaw a Presidente, uray iti baet ti panangikalintegan dagiti pasurotna nga awan ti linteg a mangiparit iti panagkandidatona, a nagbalinen a ganggannaet ti balikas ti delikadesa iti bokabulario dagiti politiko ditoy pagilian.#