PITIK: Awan ti linteg a mangiparit iti Presidente nga agkandidato iti nababbaba a puesto

Napatalgedan ti napigsa a suspetsa dagiti kritikona: agkandidato ni Pres. Gloria Arroyo a congresswoman iti maikadua a distrito ti Pampanga.

Itay Disiembre 1, opisialen nga agkandidato ni Arroyo para congresswoman kalpasan ti panangipilana ti COCna iti provincial Comelec office ti Pampanga.

Sakbay daytoy, addan panagatap dagiti kritikona nga adda naun-uneg a panggep ti masansan nga ibibisita ni Pres. Arroyo iti Pampanga ket daytoy ti panangiparipiripna ti panagtarayna iti nababbaba a posision kalpasan ti panagturpos ti terminona kas Presidente inton 2010. Iti daytoy a tawen laeng, segun kadagiti agpalpaliiw iti politika, namin-50 a bimmisita ni Arroyo iti Pampanga.

Nagliblibakan ti Malakaniang ti kinapudno dagiti suspetsa ngem ita, napudasdasan a pudno ti atap dagiti kritikona ken dagiti agpalpaliiw iti politika.

Sakbayna, naikkan ni Arroyo iti “paratignay” nga agkandidato kas congresswoman kalpasan a nasurok a 200 a supportersna manipud iti maikadua a distrito ti Pampanga nga indauluan ti anakna a ni Juan Miguel Arroyo, agdama a mangibagi iti maikadua a distrito ti nagturong iti Malakaniang idi Nobiembre 28 tapno ipakitada ti “panagmaymaysada” a mangibayog iti kandidatura ni Arroyo.

Kinuna ni Dip. Arroyo a madadaan a saan nga agkandidato kas panagraemna iti inana.

Iti panangipilana iti kandidaturana para congresswoman, kinuna ni Pres. Arroyo a “sinukimatna ti kaungganna” ket inkeddengna nga agrukbab iti awag dagiti kakailianna, ken “ipilana ti kandidaturana iti Kongreso tapno makapagserbi kadagiti nasalukag a tattao iti probinsiana”.

Kas panangikalinteganna iti desisionna, kinuna ni Arroyo a kitkitaennan ti ibababana kas Presidente inton Hunio 2010 ken tinimbangna dagiti nagduduma a turongenna a dalan ngem “kalpasan ti nauneg a panagpampanunotna, naamirisna a saan pay a sisasagana a kompleto a bumaba iti serbisio publiko” ket ti kasayaatan a wagas a mapanunotna ti panagtuloyna iti adbokasiana iti Kongreso.

Impatalged ni Pres. Arroyo a “nainget nga adda iti kontrolna ti gobierno nasional agingga iti maudi nga aldawna iti puestona sana innayon a “naregta” ti panagkandidatona iti Kongreso ngem maikadua laeng daytoy kadagiti annongenna a kas Presidente.

Kalpasan ti panangipila ni Arroyo ti kandidaturana iti Comelec, nabato kadagiti adu a pammabalaw ken kritisismo.

Ngem akuen dagiti otoridad iti Konstitusion nga awan ti linteg a makalapped ken ni Pres. Arroyo nga agkandidato iti nababbaba a puesto.

Inaklon ni Joaquin Bernas, SJ, maraem nga otoridad iti konstitusion, nga awan ti nakalanad a linteg a mangipawil ken ni Pres. Arroyo nga agtaray a kas congresswoman.

Segun met ken ni Propesor ti University of the Philippines Harry Roque, awan ti makaiparit iti panagkandidato ni Pres. Arroyo kas congresswoman iti Pampanga.

Kinuna pay ni Roque a sagudayen ti Konstitusion ti pannakaiparit ti reeleksion ti nakatugaw a Presidente ngem awan ti nakalanad a mangipawil ken ni Pres. Arroyo nga agtaray a kas congresswoman.

Uray ni James Jimenez, ti parasao ti Comelec, nakunana nga awan ti legal impediment iti panagpaibutos ti Presidente iti sabali a posision malaksid ti kina-Presidente.

Kinuna pay ti Comelec spokesman a nakalawlawag ti linteg ket awan ti pakaiselselan ti sabali nga interpretasion.

(Adda tuloyna)