PITIK: Cityhood laws, balido ken konstitusional: Korte Suprema (Maikadua a paset)

Kas ninamnama, nagrag-o dagiti sangapulo ket innem a munisipalidad a napagbalin a siudad sa napasubli a munisipalidad sa manen mapagsublida a siudad iti daytoy kabarbaro a desision ti Korte Suprema.

Iti sabali a bangir, nadismaya ti League of Cities of the Philippines iti “panangbaliktad” ti Korte Suprema iti immuna a desisionna.

Mangadawtayo iti sumagmamano a kapanunotan dagiti agtuturay kadagiti naapektaran a siudad iti daytoy baro a desision ti Korte Suprema.

Kinuna ni Mandaluyong Mayor ken LCP Pres.Benhur Abalos nga “awan ti makitana a rason no apay a binaliktad ti Korte Suprema ti desisionna”.

Adawentayo daytoy imbalikas ni Abalos: “Iti panunotko, kas maysa nga abogado, kayariganen ti entry of judgment ti death certificate. Nalansaanen a maserraan ti kaso…”

Segun ken ni Abalos, ti laeng murder case nga Aquino-Galman ti malagipna a kaso a naluktan manen ngem inyunay-unayna a naluktan daytoy iti babaen ti maysa a kangaroo court.

Maipalagip ditoy a napapatay daydi nag-Senador Benigno “Ninoy” Aquino iti tarmac ti Manila International Airport (Ninoy Aquino International Airport itan) idi naggawid ditoy Pilipinas kalpasan ti sumagmamano a tawen a kaaddana iti ballasiw taaw. Adda pay laeng ti pagilian iti babaen ti Martial Law nga impaulog daydi nag-Presidente Ferdinand Marcos.

Iti dayta met laeng a pannakapapatay ni Aquino, nagudas met ni Rolando Galman, nga intudo idi ti militar a nangpaltog ken ni Aquino.

Daytoy ti kaso a dakdakamaten ni Abalos nga addan immuna a desision ngem naluktan manen.

Kinuna ni LCP chairman ti Iloilo City Mayor Jerry P. Treñas a maikonsidera a “double jeopardy” ti naudi a desision ti Korte Suprema agsipud ta daytoy ti umuna a gundaway a mabaliktad ti maysa a pinal ken executory a pangngeddeng.

Segun ken ni Treñas, dakkel nga inhustisia ti inaramid ti kangatuan a korte kadagiti Pilipino gapu iti panangbaliktadna iti bukodna a pinal ken executory a desision.

Innayonna a gapu iti daytoy a desision, maluktan ti floodgates dagiti sumarsaruno nga espesial a cityhood laws nga ad-adda a mangkiraid ken mangipabassit iti bingay dagiti incumbent a siudad iti internal revenue allotment.

Dakamatentayo ditoy ti House Bill No. 24 a pinutar ni Zamboanga Sibugay Rep. Ann Hofera a mamagbalin ti ngulo ti probinsia a maysa a siudad no awan pay ti siudadna. No lumsot daytoy a linteg, 27 a capital towns ti agbalin a siudad uray saanda a matun-oyan ti P100 milion nga income requirement ta iti babaen daytoy a gakat, mabalindan ti agsiudad no la ketdi adda P50 milion nga annual incomeda.

Madakamat pay ditoy nga iti kaso ti 16 a munisipalidad a napagbalin a siudad, pinaboran idi ti Korte Suprema ti petision ti LCP a nangkiddawanna iti Nangato a Pangukoman nga ideklarana a saan a konstitusional dagiti cityhood laws a nangsappuyot ti panagbalin dagitoy a siudad.

Ngem idi Disiembre 23, dua nga aldaw sakbay ti Paskua, pinaskuaan ti Korte Suprema dagiti 16 a napasubli a munisipalidad babaen ti panangideklarana a konstitusional dagiti cityhood laws.

Ti saludsod: apay itan a binaliktad ti Korte Suprema ti immuna a desisionna?

(Adda tuloyna)