PITIK: Dagiti tarigagaymi a makita, maaramid ita a tawen

EMPLEADO TI GOBIERNO: Adu dagiti nagkurangak iti napalabas a tawen. Kas koma iti masansan a pannakaladawko a sumrek iti opisina ken iti masapa a panagawidko. Saanda a madmadlaw iti opisina daytoy ta adda kakumplotko a mangipirma wenno mangitaim-in kaniak.

Kasta ngamin ti aggagayyem: agkinnudkod iti bukot. Ngamin ta no isuna ti saan a sumrek, ikalbitna latta kaniak ket ammok lattan ti aramidek. Ita, idiak daytoy nga aramidko.

No oras ti opisina, agtrabahoak, saan a kas itay napan a tawen, nga ad-adu ti tsismis wenno panangadal dagiti rimmuar iti hueteng a numero wenno pannakitienda iti pagbiag, aglalo ket adda laeng iti sikigan ti kapitolio ti paglakuan kadagiti nateng, prutas, lames ken masaramsam.

Surotek ita ti “mamamayan muna, hindi mamaya na”.

OPISIAL: Saannakton a sumrek iti opisina a napudot ti ulok ket dagiti empleadok ti bugkabugkawak.

Padasek a suroten ti ballakad dagiti nataengan nga ibati dagiti problema iti pagtaengan tapno natalna ti pakinakem a sumrek iti pagopisinaan.

Saannakto metten a ruar a ruar, kan pay idi, adda iti official business kas iti monkey business wenno bullilising business wenno weightlifting (iti baso).

POLIS: Diakto met kideman lattan ti panagraira ti sugal ken droga iti ilik. Igaedko ketdi a gupden dagitoy tapno saan a mairubo dagiti agtutubo, ubbing ken uray nataengan kadagitoy makailuod a bisio. Ammok a mabalin nga adda mabaddekak a tangan, nabileg a tattao, mannakabalin ken naturay, ngem ipakatko ti linteg uray sino ti agdepdeppa (saan la ketdi nga agkayang). Masapul nga ipamatmatko nga adda pay la nabatbati a nasayaat a polis uray nalikmutak kadagiti rinuker a padak a pannakabagi ti linteg. Ti la idawdawatko, no adda man dagiti pagkurangak wenno pagkamtudak, awatendak koma dagiti kakailiak. Taoak met, narukop ken masulisog, saan kadi? Saanak a supercop tapno mariputko amin a kinadakes.

HUES: Ikarik nga ita 2010, iyad-aduk dagiti kaso a mairingpas iti salasko tapno maikkatan metten dagiti backlog ti pangukoman.

Sangkakunada a kasla pag-ong ti panaguyas ti hustisia, agpayso dayta gapu kadagiti nagkaadu a gapu.

Kas koma ti panagkurkurang dagiti hues. No ar-arigen, nabuntuon dagiti kaso iti pangukoman idinto a di met la masuktanen dagiti nagretiro a hues. Gapu siguro ta ad-adu ti masapulan dagiti law practitioners no addada iti pribada ngem iti agpaay a kas hues.

Kayatko a pukawen iti panunot dagiti tattao a ditoy pagilian, nabuntog ti panaggunay ti hustisia ngem ti rigatna ngamin kadagiti dadduma nga abogado (puera de los buenos) saan a ti pannakaipakat ti naan-anay a hustisia ti kitkitaenda no di ti sumrek iti bulsada. Adu unay dagiti panglakaganda tapno maitantan dagiti kaso. Agasem uray sangkaballing a teknikalidad, rumsikdan a kas ampo ket pagangayanna maisanud manen ti panagusig. Kasta a kasta. Isu a tawen ti bilangen santo agbanag ti kaso. Aglalo no nabaknang ti naisaklang.

Ngem kasta ti adda iti babaen ti demokrasia saan kadi?

Ita a tawen, ikagumaak ti patas a panangtimbangko kadagiti kaso a maidatag iti salak, nangnangruna no napanglaw ti maseknan. Ta no ipaidamko pay ti umisu a hustisia iti napanglaw, asino pay ti namnamaenna a pagkamanganna iti pannakaabuso ti kalintegan ken dayawna?

Ti la dawatek, agtimek koma dagiti umili. No maymaysa ti timek, dinto pulos maipangag. Ngem no rumkuas dagiti adu a timek, agallungogan iti pigsana ket mangeg iti uppat a suli ti lubong!#