PITIK: Dagiti tarigagaymi a makita, maaramid ita a tawen

Naisurat daytoy iti karabian ti Baro a Tawen ngem saan a naikamakam gapu iti di napakpakadaan a pasamak.

Nupay kasta, idasarmi ita bareng no adda seknanna kadagiti pakaidanonanna.

POLITIKO: Ita a tawen, ipalikudko pay laeng ti politika. Ti ketdi asikasuek dagiti proyekto a makatulong iti panagdur-as dagiti umili a nangnangruna dagiti kakailiak.

Lipatek pay laeng dagiti naibasbassawang, naipilpiltak dagiti kinasupangetko iti politika ket ibilangko a paset dayta iti pananggun-od iti pagannongan a kayatko a tun-oyen.

Nupay adu ti nabusbosko iti napalabas nga eleksion, diak gamden nga aramaten ti poderko tapno mapasublik dagitoy. Saanko a gamden a suroten ti naisawang ti maysa a politiko:What are we in power for?

Kasta met a saanko nga itulok a mapasublik dagiti nagastosko babaen ti panangipalubosko iti hueteng iti hurisdiksionko. Diak kayat a kontraen ti Simbaan a talaga a dina mairusok ti panagraira ti sugal nangnangruna iti hueteng. Nupay ammok nga adu ti matulongan ti hueteng kasta met nga adu dagiti awanan panggedan iti probinsiak, ikidemko lattan ti kunkuna ti Simbaan. Ngem saannak koma a pabasolen ti Simbaan no adda latta maikurkurimed a hueteng. Ta uray pay ti balasang, uray no ilakasam, no seknan ti ayat, ipamuspusanna latta tapno makadennana ti kaayan-ayatna. Kasta met ti hueteng.

Ti panagtalek dagiti umili babaen ti panangitandudoda kaniak iti agdama a puestok ti agbalin a karit kaniak tapno subadak ida iti nadalus, nadarisay ken pagwadan a serbisio.

Maaramidko laeng daytoy no sannakton a managlangan iti session wenno adda la iti Manila nga agup-uper kadagiti pagpalpaliwaan. Idiak pay laeng dagiti dibersionko (saan a bisio), kas iti panagsigarilio, panaggartem kadagiti nalapana a babbai, ken panagtadi uray dagitoy a pagliwliwaan ket mangpasanikar iti naktangan a siket, nakulkol a pampanunot ken kettang.

MEDIAMEN: Ita a tawen, padasek met nga idian dagiuti dakes nga ugali, pampanunot ken aramid a naimarka kaniak iti napalabas a tawen.

Kas koma iti pananginterbiok iti maysa a politiko wenno nalatak a tao sako alaan iti “mensahe,” tulong, rekomendasionna ken no ania ditan a pagsayaatan iti bulsa.

Idiak metten ti panangaramatko iti kinamediak tapno dumur-as iti bukodko a pagiwarnak, magasin ken no ania ditan a pagbasaan (kaadduanna a sala rummuar no nabungkong ti advertisementna). Iti kallabes, saanak payen a sumrek iti pagopisinaak, wenno addak lattan iti langlangalang a mapmapan agpasig (basaen: agsolisit) kadagiti pasdek-negosio, nangato nga opisial ken politiko. Ammok nga adda dagiti kakasta a padak a mediamen ngem iti daytoy a tawen, saanko a tuladen ken suroten ida tapno diak agbalin nga igges a media, a mangipababa kadagiti padak iti propesion a mangsursurot iti nadalus ken legal a wagas.

Kasta met a saanak nga agawat iti saburno, pasuksok, papetpet (mairaman ditoyen ti hueteng) ken no ania ditan a pagimbagan nangnangruna no daytay nagtimbukel wenno nasikkil a papel de bangko. Ammok a dakkel a paglabsingan daytoy iti propesionko, no apay ketdi a nabilegda ket masulisogak latta iti napalpalabas a tawen. Ngem ita tawen, tallikudak dagitoy barbareng sumayaat metten ti panagkita dagiti umili kadakami nga adda iti media.

(Adda tuloyna)