PITIK: Deregulasion ti lana, dina matiped panagngina ti produkto petroleo (Tuloyna)

Sakbay ti itatapog ti  kampania para iti May 10, 2010 elections, masipsiputanen ti  iseserrek dagiti party list a masuspetsa a suportado ti administrasion.

Kinapudnona, saan koma a nakadidillaw ti kaadda dagiti party list a suportaran ti administrasion agsipud ta addatayo iti nademokrasiaan a gobierno ket nawayatayo a mangpili kadagiti kayattayo a mangibagi kadatayo iti Kongreso. Ngem naikkan daytoy iti sabali a kaipapanan iti sanguanan dagiti tignay ti administrasion iti napalabas a mangpalayog iti panagturayna.

Kalpasan ti saan a panagballigi dagiti tignay dagiti asideg iti Malakaniang a mangbalbaliw iti Konstitusion iti napalabas, nagbalin a nakadidillaw ti masansan a panagbisita ni Pres. Arroyo iti Pampanga sakbay ti panagpipila iti kandidatura para iti lokal a posision, banag a nagkunaan dagiti agpalpaliiw iti politika nga adda panggep ti Presidente kalpasan ti panaggibus ti takemna nga agsubli kas diputado ken kas House Speaker.

Napatalgedan daytoy a suspetsa dagiti kritiko ni Pres. Arroyo idi impakdaar ni Diputado Juan Miguel “Mikey” Arroyo, anak ti Presidente, a saanen nga agkandidato para kinadiputado iti maikadua a distrito ti Pampanga ta ipabus-oyna iti ti puestona iti inana.

Nagbalin a dakkel nga isyo ti konstitusionalidad ti panagkandidato ti maysa a Presidente iti nababbaba a posision.

Ngem siguden nga impetteng ti Malakaniang nga ipalubos ti Konstitusion ti panagtaray ni Pres. Arroyo iti nababbaba a pabutosan a puesto.

Inkalintegan ni Cerge Remonde a kas maibasar iti lengguahe ti 1987 Constitution ken intension dagiti nangputar iti daytoy, mapawilan laeng ti Presidente nga agpailayon para iti umisu met laeng a posision ngem saan iti aniaman a pabutosan a puesto.

Kas pagaammotayon, nangipila ni Pres. Arroyo iti kandidaturana para congresswoman iti maikadua a distrito ti Pampanga, ken aglaplapusanan ti butosna itay napalabas nga eleksion.

Ngem limtuad itan nga impabus-oy ni Diputado Mikey Arroyo ti puestona ken ni  inana agsipud ta makasubli met gayam iti Kamara kas party list representative.  Ti party list group nga “Ang Galing Pinoy” a mangibagi kano kadagiti agpaspasada iti traysikel ken security guards ti pagluganan ni Dip. Arroyo nga agsubli iti Kamara.

Ni Diputado Arroyo ti numero a nominee ti nasao a party list group. Kaduana a nominee ni Dennis Pineda, mayor ti Lubao, Pampanga, anak ni mapapati a  jueteng lord Rodolfo “Bong” Pineda, asawa ni Lilia Pineda a kinasango ni Fr. Ed Panlileo para gobernador ti Pampanga nga asideg a gayyem ni Pres. Arroyo, ken ni Romeo Dungca, mayor of Bacolor, Pampanga.

Dakamatentayo ditoy nga impasa ti 9th Congress ti RA 7941, wenno Party-List System Act,  ket pinirmaan ni Presidente Fidel Ramos a linteg idi Marso 3, 1995.

Kas sagudayen ti Artikulo 6, Seksion 5 (1& 2) ti 1987 Philippine Constitution, “buklen ti House of Representatives ti saan a nasursurok ngem 250 a kameng, no saan nga intuding ti linteg ket 20 porsiento iti kameng ti Kamara ti mabutosan babaen ti party list system of voting.”

Adda 206 legislative districts iti pagilian, ngarud agdagup iti 51 ti mabutosan iti babaen ti party list system.

Adda ngarud legal a pagbatayan ti pannakabutos dagiti party list groups a mangibagi kadagiti marginalized sector iti pagpandayan-linteg.

Ngem adu la ketdi ti ngumato ti kidayna iti pannakaibulgar ni Dip. Arroyo a kangrunaan a mangibagi kadagiti tricycle drivers ken security guards. Kasano nga ibagian dagitoy nabileg a tattao dagitoy a grupo a maibilang a marginalized sector iti kagimongan?

Mabalin a saan nga annugoten dagitoy nainaganan a “mangibagi” kadagiti tricycle drivers ken security guards ngem masirip ketdi a maysa a panangsalikawkaw daytoy iti pudpudno a panggep ken intension ti party list system.

(Adda tuloyna)