PITIK: Kastoy ti klase dagiti agtuturaytayo?

Maysa a nakaawis iti imatangmi itay nabiit ti maysa a damag maipanggep dagiti nagsina a pammilin manipud ken ni Department of Justice Raul Gonzalez kadagiti acting city prosecutors iti Bogo, Carcar ken Naga iti panagtuloyda a mangakem iti pagrebbenganda iti “interes ti serbisio”.

Naipalaon iti pammilin ni Gonzalez kada Ivy Tejano, nadesignaran a City Prosecutor iti Bogo, ken Richard Abangan ken Aida Sanchez, na-assigned a mangipangulo iti Opisina ti City Prosecutor iti Carcar ken Naga, ti kaadda iti autoridadda nga agaprobar ken agpirma iti nagan ti Opisina ti Provincial Prosecutor ti Cebu, amin a resolusion ken disposision kadagiti preliminary investigations, reinvestigation ken inquests dagiti prosecutor a natudingan a mangasistir kadakuada.

Imbilin pay ni Gonzalez ti pannakaipan ni Assistant Provincial Prosecutor Lolita G. L. Lomanta iti Carcar tapno “tumulong iti inbestigasion ken prosekusion dagiti kaskaso”.

Daytoy itan ti makitami nga epekto ti panagsubli nga ili dagiti 16 a nagbalin a siudad gapu iti pangngeddeng ti Korte Suprema a saan a konstitusional ti panagbalinda a siudad.

Kas iti Carcar, Naga ken Bogo, dakkel ti problema a sangsanguen dagiti dadduma pay a siudad a napagsubli nga ili kas iti pannakapondo dagiti narugian a programa ken proyekto a nailatangan iti pondo kas maibatay iti ninamnama dagiti agtuturayda nga awatenda nga internal revenue allotment, ti manamnama a pannakakissay wenno panagsubli iti dati a sueldo dagiti empleado gapu ta agsublidan nga ili ken ti pannakapukaw dagiti puesto ken posision a naparnuay kas iti nadakamat iti ngato a city prosecutors para iti naannayas nga operasion ti gobiernoda.

Kas iti Carcar, Naga ken Bogo, dakkel a taktak ken agbalin a nakiro ti pannagna dagiti complaints ken kaskaso a naidatag iti city prosecutor’s office agsipud ta agbalin manen dagitoy a hurisdiksion iti opisina ti provincial prosecutor. Ngem ti yan ti problema, kas pammilin ni Gonzalez, adda latta autoridad dagitoy iti baet a mapukawen dagitoy a puesto iti panagbalin dagiti tallo a nadakamat a siudad a maysa nga ili.

Awan koma dagitoy a problema no saan a gapu iti panagmaniobra dagiti agilinlinteg nga akinsakup kadagitoy nga ili tapno laeng makonbertda a siudad. Impasa dagitoy nga agilinlinteg ti cityhood laws tapno laeng mailisi dagiti 16 nga il-ili kadagiti requirements para cityhood kas iti land area, populasion ken pamastrekan. Inaramidda daytoy gapu ta saan a maabut ti ilida dagiti kasapulan iti cityhood. Nakatuon ngamin ti puntiriada iti dakdakkel nga internal revenue allotment nga awaten dagitoy iti panagbalinda a siudad. Adda pay dagiti 4th ken 5th class laeng a munisipalidad a nakonbert a siudad. Iti dayta a klaseda a munisipalidad, masigurado a saan pay dagitoy a sisasagana nga agbalin a siudad ngem induron laeng dagiti agilinlinteg nga akinsakup kadakuada gapu iti manamnama a dakdakkel nga internal revenue allotment nga awatenda no agbalinda a siudad.

Panangipagarup siguro dagiti agilinlinteg ket agulimek lattan dagiti agtuturay dagiti siudad a maapektaran iti yaadu dagiti agbalin a siudad. Daytoy ti dakkel a nagbiddutanda. Ti kuton, kuminnit no mabaddekan. Kapilitan a nagriri dagiti city mayors agsipud ta nagdakkelan metten ti maikkat iti IRAda gapu iti panagtubo a kasla uong dagiti kabarbaro a siudad a makibingay kadakuada.

Maysa ketdi daytoy a pammaneknek a mapagduaduaan dagiti agilinlintegtayo no bukodda nga interes ti pagsasaritaan. Iti daytoy a panangiduronda iti ilida nga agbalin a siudad uray ammoda a saanna a maabut dagiti requirements para cityhood, impakitada a saanda nga agpangadua a mangiwalin iti interes ti kaadduan no bukod a pagimbagan ti ilida ti maseknan.

Kastoy ti klase dagiti agtuturaytayo, kaka! #