PITIK: Kuarta a gunggona, dina marisut dagiti political killings

Itay nabiit, inwaragawag ni Pres. Gloria Arroyo ti pannakaipasdek ti dakkel a pondo a panggunggona kadagiti tattao a makaited iti impormasion a makatulong iti pannakatiliw, pannakarisut wenno pannakaitudo dagiti adda iti likudan wenno utek dagiti pammapatay a politikal a kangrunaan a biktima dagiti militante nga aktibista ken kritiko ti gobierno.

Dakamatentayo ditoy nga iti kallabes, nagsagrap ti administrasion ni Pres. Arroyo kadagiti pammabalaw gapu iti mapaliiw nga awan ti magudilan ti gobierno mainaig kadagitoy a pammapatay wenno iti mapapati a kaawan ti panangitaltalek ti lideratona iti pannakaputed wenno pannakapukaw kadagitoy a political killings.

Ipetpetteng dagiti agtuturay nga ar-aramidenda amin a kabaelanda tapno malapdan ken mapukaw dagiti pammapatay kadagiti militante nga aktibista ken kritiko ti gobierno ngem iti baet dagita a pammatalged, agtultuloy latta dagiti krimen a kangrunaan a maitudtudo dagiti soldado wenno kameng ti militar, banag a pinaglibakan met dagiti nangato nga opisialda.

Ket maysa nga estratehia a napanunot ti administrasion Arroyo ti pannakaipasdek ti P25 milion a pondo a mangted iti gunggona kadagiti impormante a makatulong iti pannakasolbar kadagiti political killings.

Ngem iti panirigan dagiti umili a mariribukan unay iti saan a pannakaited iti hustisia kadagiti aktibista ken kritiko a biktima ti pammapatay, saan nga umdas daytoy nga estratehia ti gobierno.

Awan ti magudilan daytoy nga estratehia ti gobierno a mangpasardeng iti political killings, segun ken ni Manila Auxiliary Bishop Broderick Pabillo.

Iti biangmi, adda pagbatayan daytoy mararaem nga obispo a nangibatad iti dina panamati iti daytoy nga addang ti gobierno agsipud ta patienmi a saan nga epektibo ti maitanggaya a kuarta a gunggona kadagiti impormante mainaig kadagiti pammapatay a politikal tapno mapabassit ti bilang dagiti kastoy a krimen.

Mamatikami a saan a kuarta a gunggona ti kasapulan tapno masolbar dagiti political killings iti pagilian no di ti panangipakita ti gobierno nga adda tangken wenno ngipenna a mangipakat iti linteg tapno madusa no asino dagiti adda iti likudan dagitoy a pammapatay.

Uray no kasano kadakkel dagiti gunggona a kuarta, agpangadua la ketdi a lumtuad dagiti saksi wenno adda ammona mainaig iti pannakaitudo dagiti kriminal wenno utek kadagiti pammapatay no awan ti political will ti gobierno a mangdusa wenno mangited iti hustisia kadagiti biktima.

Wenno saan, pagan-ano ti saksi wenno impormante ti lumtuad no pagaammona a nangato nga opisial ti militar wenno agtuturay ti adda iti likudan dagitoy a pammapatay? Pagan-anom ti dakkel a gunggona no karkarawaem metten ti tengngedmo ket sangkataliawmo ti likudam amangan no adda umar-arubayan nga anniniwan a suspetsam a mangipalnaaw kenka tapno agulimekkan a maminpinsan?

Kangrunaan ketdi nga aramiden ti administrasion ti panangipakitana nga umuna nga adda tulangna a mangisaklang iti hustisia dagiti masuspetsa nga adda iti likudan dagiti pammapatay a politikal. Ipakitana nga uray asino ti mabaddekan iti daytoy a panangipakatna iti linteg, saan nga agkir-in wenno agkirem ta ti importante, ti pannakaited iti naan-anay a hustisia iti biktima ken dagiti pamiliana. Iti daytoy laeng a wagas a mapasardengna dagiti political killings iti pagilian.#