PITIK: Kultura ti Kinadamsak (Maudi a paset)

Ngem iti baet ti panangibagbaga ti turay ken dagiti nangangato nga opisial ti AFP ken ti PNP a saanda a polisia ken saanda a sarurongan ti pannakaitalaw ken pannakapapatay dagiti aktibista ken kameng ti militante a grupo, itay nabiit, maysa nga anak ti komander ti komunista a grupo ti naipadamag nga intalaw dagiti saan a nabigbig nga armado a lallaki idi aggawid daytoy manipud iti St. Peter’s College iti Toril District iti Davao.

Nasarakan laengen ti bangkay ni Rebelyn Pitao iti maysa a kanal, addaan iti pagilasinan a nadusdusa, nabekkel, nabagsol ken narames pay.

Nagpiestaan met itay nabiit dagiti pagiwarnak ti iluluttuad ti maysa a Filipino-American nga aktibista a nangipalgak nga intalaw dagiti soldado ken dinusdusada iti nakailemmenganna a lugar iti Tarlac idi Mayo daytoy a tawen.

Kinuna ni Melissa Roxas a naipan iti maysa a lugar nga atapenna nga iti probinsia ti Tarlac ket nagsasaruno dagiti interogasion kenkuana dagiti di nagpabigbig a tattao uray iti adalemen a rabii mainaig kadagiti aktibidadna. Impetteng kano dagiti nangitalaw kenkuana a maysa a komunista. ket impangtada nga adda dakes a mapagteng kenkuana no dina akuen a pudno ti maipabpabasol kenkuana.

Posible a saan koma a dimmakkel daytoy a damag no saan a Fil-American ni Roxas.

Dagitoy a napasamak ti mangipakita nga agtultuloy latta dagiti pannakaitalaw ken pannakapapatay dagiti kamkameng ken dadaulo nga aktibista ken kumankannigid a grupo.

Ti saludsod: adda kultura ti kinadamsak iti pagilian?

Imbataden kadagiti obispo ti kaaddana iti sanguanan dagiti di malapdan a pannakapapatay, pannakaitalaw dagiti kameng ti kumankannigid a grupo ken uray payen dagiti agiwarwarnak.

Ipetpetteng met dagiti dadaulo dagiti militante a grupo ken dagiti kumankannigid a tattao nga adda maiwaywayat a panagitalaw ken panagpapatay kadagiti kameng ken liderda sada itudo ti militar nga adda iti likudan dagitoy.

Ngem iti biang ti militar, dagiti komunista ti adda iti likudan dagitoy a panagpapatay kas paset ti panangdalusda iti grupoda kadagiti maatap nga espia ken kamkameng a nakabasol iti tignay.

Iti met biang ti polis, nupay inakona nga adda dagiti kaso ti pammapatay nga adda pannakaibiang dagiti pannakabagi ti linteg, nakasuan dagitoy ken adda payen warrant of arrest dagiti dadduma. Nupay kasta, kinuna dagiti opisial nga isolated cases la dagitoy ket saanda a nagliway iti pagrebbenganda a mangarisit kadagiti dakes nga itlog iti las-ud ti kapolisan.

Iti biang met ti sumagmamano a senador a pakairamanan da Sen. Francisco Escudero, Jinggoy Estrada, Miriam Defensor-Santiago, Juan Ponce Enrile ken Rodolfo Biazon, nangputarda iti Anti-Torture Bill a mangdusa kadagiti naglabsing agraman dagiti opisialda kas iti pannakasentensiada iti pannakaibalud iti tungpal biag no nagtungpal iti pannakatay ti pannakaparparigat, no adda naisayangkat a panagrames ken no naipakat kadagiti ubbing.

Iti daytoy a gakat, maideklara nga aramid a kriminal ti panagparigat kadagiti biktima ket dagiti makipartisipar iti daytoy nga aramid, madusa a kas prinsipal kas met laeng dagiti superiorda iti militar, polis wenno establisimiento nga agipakpakat iti linteg a nangibilin iti pannakaparigat a pisikal ti maysa a biktima. madusa amin a porma ti panagdusa, pisikal, mental, sikolohikal, ken parmakolohikal a pannakaaramat ti droga.

Mairaman a sagudayen ti gakat ti probision para iti pannakaprotektar dagiti nagipulong ken saksi ken dadduma a tattao a nainbolbar iti persekusion ken iti pannakaipasdek ti maysa a programa ti rehabilitasion para kadagiti biktima.

Iti papel, napintas daytoy a gakat. Yan ti kuestion ti pannakaipakatna.

Madakamattayo ti maysa a nangato nga opisial ti militar a binuniagan pay dagiti nadumaduma a grupo a militante a “berdugo” gapu iti mapapati a pannakainaigna kadagiti panagpukaw ken pannakapapatay dagiti kamengda.

Agingga ita, awan ti maikaso kenkuana gapu iti kaawan dagiti saksi ken makaibaga nga isu ti nagbilin iti pannakaitalaw ken pannakapapatay dagiti biktima.

Pinadayawan pay ni Pres. Arroyo daytoy nga opisial kabayatan ti SONAna.

Ita, maysan a kameng ti Kongreso agsipud ta nakalusot a kas party list representative a pannakabagi kano dagiti security guard ken guardia iti Kamara.

Ti saan a pannakadusa dagiti agaramid iti panagitalaw ken panagpapatay kadagiti biktima ti maysa kadagiti nangbabalawan dagiti obispo iti administrasion Arroyo. Impunity, kunada iti Ingles. Daytoy met la a balikas ti inaramat ni Alston iti reportna mainaig kadagiti extrajudicial killings iti Pilipinas.

Panawenen tapno ipakita ti liderato a pudpudno a dina sarurongan dagitoy nga aramid a mangit-ited iti dakes nga imahe iti turay babaen ti pannakaisaklang dagiti nagisayangkat uray kasano kangato ti ranggo wenno takemda iti turay iti korte ket madesisionan ti kaso iti nabiit a panawen.#