PITIK: Kultura ti Kinadamsak (Tuloyna)

Naipalaon iti report ni Philip Alston, UN rapporteur for extra-judicial killings, a naggian ditoy Pilipinas iti siam nga aldaw, manipud Pebrero 12-21, 2007 ket napan nagpalutpot iti siudad ti Davao, Baguio ken Manila ken nakapatangna dagiti senior nga agtuturay ti gobierno, dagiti kameng ti Armed Forces of the Philippines ken ti Philippine National Police kasta met dagiti civil societies nga agsusupadi ti kapanunotanda, naginterbio kadagiti saksi iti 57 nga insidente a nakainbolbaran iti 97 nga extra-judicial killings ken immawat iti file maipanggep kadagiti 271 extrajudicial executions.

Dinakamat ti report nga iti napalabas a nasurok nga innem a tawen, adu dagiti pammapatay a nakaiwalinan dagiti lider dagiti civil societies a pakairamanan dagiti human rights defenders, trade unionists, land reform advocates ken dadduma pay, nabutbuteng dagiti civil society actors ken napailet ti political discourse.

Depende no sino ti agbilbilang ken no kasano, agarup 100 agingga iti 800 ti kadagupan a bilang dagiti extrajudicial executions, kinuna pay ti report.

Idi rimmuar ti report ni Philipp Alston, UN rapporteur for extrajudicial killings, nangiparuar ni Pres. Gloria Arroyo iti statement nga awaten ti gobierno a “konstruktibo” ti report iti baet ti kaadda dagiti sumagmamano a kritikal a balikas maikontra iti militar ken iti administrasionna.

Kinuna ti Presidente a serioso ti gobierno iti pannakarisut ti nasao a problema ket pinalubosanda ni Alston nga awan sawirna a nagimbestiga ken mangited iti sibubukel a reportna iti media.

Kinuna ti Presidente a daytoy ti pammaneknek a respetuen ti gobierno ti Pilipinas ti demokrasia, kalintegan pantao ken nawaya a prensa.

Iti sabali a bangir, inkalintegan dagiti agtuturay ti administrasion babaen ti panangibatadda a maikontra iti linaon ti report, saan kasta ti polisia ti gobierno Arroyo agsipud ta saanna a sarsarurongan dagiti extrajudicial a panagpapatay.

Tagipatgen ti Presidente ti kalintegan dagiti tattao,” inyunay-unay ni Lorelie Fajardo, deputy spokesperson ti Presidente.

Kinuna met ni Executive Secretary Eduardo Ermita nga awan ti ilemlemmeng ti turay mainaig kadagiti extrajudicial a panagpapatay. Dinakamat pay ni Ermite a maysa ti Pilipinas kadagiti lima a pagilian iti sangalubongan a nangilanad ti pannakabuangay ti maysa a komision iti human rights iti konstitusionna.

Iti met biang ti Philippine National Police, kinuna ni Chief Supt. Samuel Pagdilao, pannakangiwat ti PNP nga iti bukod daytoy a panagimbestiga, maitudo a dagiti kameng ti militar ti nagisayangkat iti sumagmamano a pammapatay, kasta met ti PNP ken ti CPP-NPA ngem saanda a konektado kadagiti sumagmamano a pammapatay.

Segun ken ni Pagdilao, addan dagiti kaso a naisaklang kadagiti nadumaduma a korte ket kas pammaneknek nga adda pagbatayan kadagitoy a kaso, nangiparuaren dagiti korte iti warrant of arrest maikontra kadagiti akusado.

Iti interbiona iti media, kinuna ni Pagdilao a respetarenna ti takuat ni Alston a kas opinionna ngem sabalin a banag no masuportaran wenno saan daytoy kadagiti ebidensia a makatakder iti korte, ditoy pagilian wenno iti sabali a nasion.

Indagadag pay ni Pagdilao a no adda ebidensia ni Alston a mangtulong iti PNP, idatagna koma tapno agbalinda nga instrumento ti hustisia.

Ngem iti biang ti Armed Forces of the Philippines, krinitikarna ti report ni Alston a “nakusel” agsipud ta nagtalinaed laeng daytoy iti pagilian iti las-ud ti sangapulo nga aldaw.

No laeng nagtalinaed a nabaybayag ni Alston ditoy pagilian, wenno nakapatangna ti ad-adu pay a tattao ngem dagiti nangited iti pakpakauna a data, maammuanna koma ti pudpudno a situasion ti human rights iti Pilipinas,” daytoy ti naiyebkas ni AFP chief (nagretiron) Hermegones Esperon

Kas iti gobierno, iti biang ti militar, saan a polisia ti Armed Forces of the Philippines ti pannakaisayangkat kadagiti extrajudicial killings agsipud ta bigbigen ken respetarenna ti kalintegan dagiti tao, kas naited kadagiti umili iti maysa a demokrasia.

Kinuna ni Lt. Col. Bartolome Bacarro, hepe ti Public Information Office ti AFP, a saan nga ibaddek ti AFP, kas maysa nga organisasion dagiti kalintegan ti sabali, pakairamanan dagiti mangbabbabalaw iti AFP wenno iti gobierno.

(Adda tuloyna)