PITIK: Kultura ti Kinadamsak

Itay nabiit, kinondenar dagiti obispo ditoy pagilian babaen ti maysa a pastoral letter ti “kultura ti kinadamsak ken patay” iti babaen ti agdama nga administrasion.

Dagiti pannakaabuso ti kalintegan pantao, extra-judicial killings, panangdangran ken pamutbuteng a mapapati a taktika iti babaen ti administrasion Arroyo ti dakdakamaten ditoy ti Catholic Bishops’ Conference of the Philippines (CBCP), ti nabileg a gunglo dagiti obispo ditoy pagilian, a “kultura ti kinadamsak ken patay”.

Maibilang daytoy pastoral statement ti CBCP a panagbaw-ing iti immuna a pagtaktakderanna. Iti napalabas, nupay imbatadna nga adda dagiti dakkel a sosial ken politikal nga isyo a mapapati a nakairamanan dagiti nangato nga opisial ti turay, saan nga apektado dagiti nadumaduma a rehion iti ruar ti Metro Manila ket agtultuloy ti panagdur-as ken panagprogreso dagitoy.

Nupay adda dagiti anomalia ken panagkunniber ken pannakaisayangkat kadagiti krimen, panagtakaw, pammapatay ken panagitalaw a mapapati nga adda pannakaibiang ti militar, saan a kimmanunong dagiti obispo iti tignay a mangpaulog iti presidente iti puestona. Ketdi, arig indagadag dagiti obispo ti pannakaited iti naan-anay a gundaway iti administrasion a mangrisut kadagitoy a problema a kangrunaan a pakababbabalawanna.

Madakamat ditoy a nakapigpigsa idi kanikadua a tawen dagiti timek a mangiyik-ikkis iti yuulog ti agdama a liderato ti pagilian gapu kadagiti alegasion ti panagsuitik iti eleksion idi 2004 kas impalnaad ti Hello Garci tapes no sadino a nakaipalaonan ti pannakipatang ti maysa a babai a katimtimek ti Presidente ken ni Comelec Commissioner Virgilio Garcillano mainaig iti eleksion, dagiti anomalia a mapapati a nakaisangkotan dagiti nangato nga opisital ti turay a kas iti ZTE scandal, North Railway ken dadduma pay.

Pinaglibakan ni Presidente Arroyo dagitoy nga alegasion ket impettengna nga isu ti pudpudno a nangabak iti eleksion idi 2004 a nagsanguanda ken ni aktor Fernando Poe, Jr.

Sumagmamano met nga impeachment complaint ti naisaklang iti Kamara maikontra ken ni Pres. Arroyo ngem saan a dimmur-as dagitoy babaen ti tulong dagiti kaaliadona.

Daytoy ti pagtaktakderan dagiti obispo iti kallabes. Ngem itan, mapaliiw a nadagdagsen ti disnog ti pastoral statement nga imparuarda itay napan a bulan.

Taliawentayo ti sumagmamano nga imbatad dagiti obispo iti kaudian a pastoral letterda:

*Saan a maputpot a panagtultuloy dagiti panagsaneb, panagkidnap, extortion ken panagdawat iti rebulosionario a buis;

*Mapapati a di panagsardeng dagiti saan a maipalawag a pammapatay ken panagpukaw dagiti agiwarwarnak, lider iti trabaho, dagiti mangmangged ken politika ken uray dagiti babassit a kriminal;

*Pannakaisayangkat ti taktika ti pannusa ken pammutbuteng.

Kinuna dagiti obispo nga “uray ti linteg ket manipular tapno ma-harass dagiti tattao babaen ti pannakaipila dagiti awanan pagbatayan a kaso iti korte nangnangruna kadagiti napanglaw ken mapalusposan a siwawaya dagiti nakabasol.”

Kinuna dagiti obispo a rumbeng nga awan dagiti armado a grupo, kannigid, kannawan wenno iti sentro, a maabsuelto kadagiti krimen ti kinadamsak sana imbatad a kangrunaan a responsibilidad ti gobierno ti pannakapasardeng ti kultura ti kinadamsak ken patay iti pagilian.

Kinunana pay a rumbeng a serioso a tungpalen ti gobierno dagiti rekomendasion dagiti nabuangay a task force wenno investigative bodies para iti pannakaisardeng daytoy a kultura ti kinadamsak ken patay a saan ketdi a dismisenna dagitoy a kas propaganda laeng wenno saan nga umno nga impormasion.

(Adda tuloyna)