PITIK: Mapugipogen ti agraira nga armas? (Tuloyna)

Itay Agosto 1, rinugian ti Philippine National Police ti panagproseso kadagiti aplikasion ken pannakapabaro iti lisensia dagiti agraraira nga armas ditoy pagilian.

Segun ken ni PNP chief Director General Jesus Versoza, insapsapa ti PNP ti agproseso kadagiti aplikasion para iti pannakalisensia dagiti armas tapno awan ti rason a saan a naikkan dagiti umili nga agik-ikut iti armas iti gundaway nga agaplikar iti lisensiada sakbay ti panagepekto ti makabulan a general amnesty para iti pannakaireshistro dagiti agraira nga armas kas sagudayen ti Executive Order 817 ni Pres. Gloria Arroyo.

Kinuna ti hepe nga iti pannakaisapsapa ti pannakaproseso dagiti aplikasion para iti lisensia dagiti agraira a paltog, inton maipakat ti amnestia, naprosesodanton amin nga aplikasion ken maikkan dagiti agikut iti napabaro a license cards.

Segun pay iti hepe, naipatuloden kadagiti amin a police units iti pagilian ti listaan dagiti agikut iti armas a nagpason ti lisensiada tapno mapalagipan dagitoy a mangpabaro iti rekord ti armasda tapno saanda nga agsalungasing iti linteg.

Kinuna ni PNP spokesman Senior Supt. Leonardo Espinanga adda aganay a 500,000 nga agikut iti armas a nagpason ti lisensiada.

Puntiria ti PNP a saan a nababbaba ngem tallo a porsiento iti binulan dagiti mairehistro nga armas tapno mapabassit ti mapattapatta a 1.1 milion nga agraraira a armas nga adda iti ima dagiti saan nga autorisado ken delingkuente a tattao, dagiti managdakdakes ken dagiti pribado nga armado a grupo.

Ditoy Region I, inreport ni regional director Chief Supt. Ramon V. Gatan nga adda nakurang a 27,000 a saan a nakarehistro nga armas iti ikut dagiti “threat groups”, kriminal nga elemento ken sibilian idinto nga innayonna a kangrunaan a pakaseknan ti kapolisan iti babaenna dagiti insidente ti pammaltog kadagiti nadumaduma a probinsia iti rehion gapu iti kaadda dagiti matangdanan a grupo ken agraira nga armas.

Itay laeng agtapos ti bulan ti Hulio, lima a mapapati a kameng ti kidnap-for-ransom a grupo ti nagudas iti maysa a ranget iti nagbaetan dagitoy ken dagiti pannakabagi ti linteg iti siudad ti Dagupan.

Annugoten ti kapolisan a dakkel ti maitulong dagiti umili no maawisda a makitinnulongda iti kampania para iti pannakapugipog dagiti agraraira nga armas. Ngarud, mangipaay ti PNP kadagiti umili iti insentibo kas iti pannakaited ti kuarta a gunggona kadagiti makaited iti inpormasion nga agtungpal iti pannakakumpiska kadagiti maiduldulin nga armas.

Imballaag ni Versoza a kalpasan ti amnestia, maipakatan iti agtatappal nga aksion dagiti saan nga agtungpal iti pammilin a mangirehistro wenno mangpabaro iti lisensia ti paltogda. Malaksid a makumpiska dagiti armasda, sumango pay iti naunday a pannakabalud dagiti masukalan nga agik-ikut iti kolorum wenno saan a lisensiado nga armas agsipud ta saan a mapiansaan ti illegal a panagikutda iti armas ken kas sagudayen ti linteg, no matakuatan a nagsalungasing iti linteg, mabalud iti maysa agingga iti 12 a tawen.

Panagkitami, serioso iti daytoy a gundaway ti PNP iti kampaniana maikontra kadagiti loose firearms. Suportaranmi daytoy a kampania ti PNP ta iti bukodmi a kapaliiwan, adu unay dagiti armas iti ima dagiti tattao, nangruna dagiti saan a rumbeng koma nga agikut iti armas.

Dagitoy agraraira a saan a lisensiado wenno kolurom nga armas ti kangrunaan a maar-aramat kadagiti krimen iti pagilian a pakaibilangan ti panagtakaw, panaghold-ap, pammapatay ken dadduma pay a krimen.

Kasta met a kapaliiwantayo a gapu iti panagraira dagiti loose firearms, nagbalin a nadara ken narugit dagiti eleksion iti pagilian gapu iti pannakaaramat dagitoy a pangbutbuteng , pammapatay, ken panangleplep iti pudpudno a karirikna dagiti botante.

Sapay ngarud ta agballigi ti PNP iti daytoy a kampaniana. Siputantayo ngarud no natallugod nga agtungpal dagiti agik-ikut iti armas iti daytoy a kampania.#