PITIK: Mapugipogen ti agraira nga armas? (Tuloyna)

Kas inwaragawag itay nabiit ni Director General Jesus A. Verzosa, PNP Chief, mangisayangkat ti PNP iti agresibo nga operasion para iti pannakakumpiska dagiti loose firearms kas panagtungpal iti pammilin ni Presidente Gloria Arroyo babaen ti Executive Order No. 817 mangiyimplementar iti National Firearms Control Program.

Kas pakpakauna nga addang, inaprobaran ti PNP Chief ti implementing rules and regulations (IRR) a mamagkuti iti administratibo ken operational procedures kas sagudayen ti Exec. Order No. 817 a pagbatayan dagiti amin a kuerpo ti kapolisan para iti pannakapugipog ken pannakatunton dagiti agraraira nga armas iti intero a pagilian .

Makabulan ti naited nga amnestia para iti pannakaisuko dagiti armas nangruna dagiti saan a lisensiado wenno nagpason ti lisensiada.

Iti pattapatta ti polis, adda nasurok a 500,000 nga agik-ikut iti armas a saan a nakapabaro iti lisensiada iti intero a pagilian. Pattapattaen pay ti polis nga adda 1.1 milion a kadagupan dagiti loose firearms iti ima dagiti umili ken nadumaduma a grupo.

Kanaig daytoy, rugianen ti PNP ti agproseso kadagiti aplikasion para iti pannakairestro dagiti kolurom a paltog ken pannakapabaro ti lisensiada agsipud iti pattapattada nga agdadarison dagiti mayat a manggundaway iti amnestia nga itangtanggaya ti gobierno ken ti polis tapno saanda a mamulta wenno maipaayan iti surcharge.

Kasta met nga iti pannakaitanggaya ti pinal nga amnestia manipud iti Oktubre 1-31, ikkan ti polis dagiti umili wenno grupo nga agik-ikut kadagiti awanan dokumento nga armas a mangisuko kadagitoy tapno maliklikanda iti kriminal a pannusa. Iti sabali a bangir, maikkan iti gundaway dagiti agig-iggem kadagiti armas a mangirehistro kadagiti armasda tapno agbalinda a lisensiado.

Segun ken ni PNP Chief Director General Jesus Versoza, napasimple ti proseso tapno nadardaras ti pannakalisensia dagiti armas .

Kas sagudayen ti waragawag ni Verzosa, kalpasan ti makabulan nga amnestia, mangruginto metten ti panangisayangkat dagiti polis kadagiti napingpinget nga operasion tapno mapugipog ti panagraira dagiti armas. Iti nalawlawag a pannao, makumpiska amin dagiti aglemlemmeng nga armas nga adda ikut dagiti umili nangruna dagiti awanan lisensia ken dagiti nagpason ti lisensia nga armas.

Nalawa ti saklawen ti National Firearms Control Program a pakairamanan ti panna-account amin dagiti armas nga adda iti ikut dagiti umili agraman dagiti nagpason a lisensia, dagiti armas nga adda iti ikut dagiti agpangpangta a grupo ken kriminal nga elemento; pannakabilang amin dagiti nakumpiska, naisuko, naideposito, napanawan ken forfeited nga armas iti kustodia ti Armed Forces of the Philippines, Philippine National Police ken dadduma pay a law enforcement agencies ken dagiti adda iti kustodia ti korte a naidatag a kas ebidensia.

Saklawen pay ti programa ti panangisayangkat dagiti polis kadagiti operasion maikontra kadagiti saan a rehistrado nga armas nangruna kadagiti lugar a maibilang a yuyeng ti krimen; pannakaisayangkat iti mobile checkpoint ken chokepoint operations, intelligence build-up, internal security operations, panagsukisok, ken panangwara kadagiti pribado nga armado a grupo.

Tapno ad-adda nga epektibo ti pannakaipakat ti nasao a programa, mangnamnama dagiti opisial ti PNP a masuportaran daytoy iti linteg a mangited iti nadagdagsen a pannusa kadagiti masukalan nga agikut iti armas nangruna kadagiti kameng ti organisado a grupo ti kriminal ken iti panagbalin a saan a mapiansaan dagiti matiliwan nga agikut iti tallo wenno ad-adu pay nga armas.

(Adda tuloyna)