PITIK: Mapugipogen ti agraira nga armas?

Iti bulan ti Hulio, naireport ditoy Rehion I dagiti krimen a nakagudasan ken nakasugatan dagiti biktima. Kaaduanna a paltog ti naaramat kadagitoy nga insidente.

Mangibinsabinsatayo iti sumagmamano a pasamak iti nadumaduma a probinsia ditoy Rehion I.

Iti San Nicolas, Ilocos Norte, dua a lalaki ti nagudas bayat ti itatabunoda iti maysa a kasangay. Madama ti panagiinom dagiti dua idi immasideg ti suspetsa ket pinaltoganna ida.

Kalibre 45 ti mapapati a naaramat iti pammapatay maibasar kadagiti kapsula a narekobre dagiti polis iti nakapasamakan ti krimen.

Iti Laoag City, maysa a kabsat ti polis ti nakasuan gapu iti pammaltog. Iti sabali pay a kaso, maysa a barangay kapitan ti nangpaltog iti maysa a barangay tanod idi mapapati a dina maanawa iti panagprobokar daytoy.

Iti La Union, maysa a security guard a taga-Botobot, Balaoan ti nakasuan kalpasan ti pannakakumpiska kenkuana ti napagango a marihuana ken panagikutna iti paltog ken bala.

Nakasuan metten itay nabiit ti suspetsa a mapapati a pimmatay iti elektrisian-karpintero iti naraut a laboratorio ti shabu iti Barangay Bimmutubot, Naguilian sada inkali.

Iti Pangasinan, pito a tattao ti nakasuan iti korte gapu ti panangambusda iti maysa a pamilia iti ili a Villasis.

Itay laeng nabiit, tiniliw dagiti polis ti uppat a tattao a kameng ti maysa a grupo dagiti patangtangdanan a pumatay iti safehouseda iti Barangay San Leon, Umingan.

Ditoy Ilocos Sur, maysa a rebel-returnee ti inarmalait dagiti di nabigbig a dua a lalaki ken maysa a babai a masuspetsa a kameng ti New People’s Army.

Sabali pay a mannalon ti naarmalait iti Barangay Callitong, Burgos a puon ti dagus a nakatayanna.

Dagitoy nga insidente ti mangpaneknek nga adu dagiti armas ditoy pagilian nga adda iti ikut dagiti tattao wenno grupo a rumbeng koma a saan nga agikut iti armas. Dagitoy nga insidente ti mangmangted iti dakes nga imahe kadagiti probinsia nangruna iti urnos ken talna.

Ngem manamnama a mapabasssitton ti bilang dagiti krimen ditoy pagilian a pakairamanan ti rehion I a nakaaramatan dagiti paltog kalpasan ti panangipaulog ni Pres. Gloria Macapagal-Arroyo iti Executive Order No. 817.

Ania daytoy Executive Order No. 817 wenno National Firearms Control Program?

Pammilin daytoy nga impaulog ni Pres. Arroyo itay nabiit a mangited iti makabulan nga amnestia kadagiti agik-ikut iti armas a mangpabaro iti lisensiada (no nagpason) wenno mangirehistro iti armasda iti Philippine National Police.

Manipud Oktubre 1-13 iti daytoy a tawen ti pannakaited ti nasao a pinal nga amnestia kadagiti agik-ikut.

Kangrunaan a panggep ti Executive Order ti pannakapabassit ti bilang dagiti agraraira a paltog nga adda iti ikut dagiti agpangpangta a grupo, kriminal nga elemento, agik-ikut iti paltog a sibilian ken dilingkuente nga agik-ikut iti armas a maar-aramat iti pannakaisayangkat kadagiti krimen nga adda kanaigda iti eleksion a mabalin a manglapped iti pannakagun-od iti natalna, naurnos ken kredible a panagpipili inton 2010.

Tumulong ditoy ti Armed Forces of the Philippines, National Bureau of Investigation, Bureau of Customs, Philippine Ports Authority, Philippine Drug Enforcement Agency ken dadduma pay a law enforcement groups iti pannakakumpiska dagiti loose firearms.

Iti kaadu dagiti agtitinnulong a nadumaduma nga ahensia, manamnama ngarud ti nainget a pannakaipatungpal iti pammilin ti presidente a pannakapugipog dagiti agraraira nga armas.

Ta saan a mailibak, adu dagiti armas nga adda iti ikut dagiti tattao a maar-aramat iti pammapatay, panaghold-ap, panagtakaw, panaglako kadagiti maiparparit nga agas ken iti tunggal eleksion, maaramatda a pammutbuteng, panagpapatay, mangriribuk ken panagisayangkat iti panagsuitik.

(Maituloyto)