PITIK: Nasken kadi nga agangkat ti gobierno iti bagas?

ITAY NABIIT, indagadag ti gunglo a mangibagi kadagiti mannalon ti panagsardeng ti gobierno nga agangkat iti bagas. Apay nga agangkat ti gobierno iti bagas manipud iti Vietnam iti baet a nabagas ti apit dagiti mannalon ditoy pagilian? saludsod ti Abono, party-list a mangibagi kadagiti mannalon iti Kongreso.

Wenno iti sabali a punto, adda kadi panagkisang ti bagas iti pagiliantayo tapno kasapulan nga agangkat ti gobierno?

Madakamat ditoy a tinawen ti panagangkat ti pagilian iti bagas manipud iti kabangibangna a pagilian. Nabirngasan pay ketdin ti pagiliantayo iti kallabes a masaksakit a lakay iti deppaar ti Abagatan-a-Daya ti Asia gapu ta kinamakamdatayon dagiti kaarrubatayo a pagilian no panagdur-as ti pagsasaritaan. Uray ti Vietnam a nadalupo iti gubat, dumurdur-as ti ekonomiana ket dakkel ti posibilidad nga abutenna ti Pilipinas.

Mainayon ditoy nga iti kallabes, ditoy pagiliantayo ti nakapatanoran dagiti miracle rice a nangpadakkel iti produksion ti pagay. Ditoy ti nagadalan dagiti kaarrubatayo a pagilian kas iti Thailand maipapan iti panagmula kadagiti pagay a malaksid a natibker iti sakit, nangato ti kalidadda ken ad-adu nga amang ti pakaapitanda.

Ita, dagitoy a pagilian a nagsisip iti adal iti agrikultura ditoy pagilian, isudan dagiti maibilang a kangrunaan nga aglaklako iti bagas iti sangalubongan.

Iti sabali a bangir, sangkadagullit dagiti agtuturay iti agrikultura a dumakdakkel ti produksion ti pagay. No pudno daytoy, apay nga agangkattayo iti bagas?

Idi apagtapog daytoy a tawen, naipadamag nga adda sabali manen a tulagan iti nagbaetan ti pagilian ken ti Vietnam para iti panagangkat ti gobiernotayo iti sumagmamano a milion a tonelada ti bagas.

Babaen iti daytoy a katulagan, mapattapatta a maysa a milion agingga iti 1.5 milion a tonelada ti gatangen ti Filipinas a bagas manipud iti Vietnam mangrugi idi Pebrero daytoy a tawen.

No anagen, iti baet ti panangibanbando ti gobierno nga adda umdas a bagas para kadagiti umilina, kasla inannugotnan nga adda panagkisang ti bagas gapu iti panagangkatna iti daytoy kangrunaan a taraon dagiti Pilipino manipud iti Vietnam.

Pinatalgedan ni Agriculture Secretary Arthur Yap daytoy a suspetsa iti interbiona iti media bayat ti maysa nga ekposision iti agrikultura itay nabiit.

Inkalintegan ni Yap a kasapulan ti gobierno nga agangkat iti bagas manipud iti Vietnam ta nupay napintas ti apit iti daytoy a panagtatalon, agkurang iti 10% tapno masulnitanna ti aktual a kasapulan a taraon dagiti umili iti sibubukel a pagilian.

Gapu iti daytoy a 10% a kurang, kasapulan ti gobierno ti agangkat iti bagas tapno masiguro ti seguridad iti daytoy a taraon, inyunay-unay ni Yap.

Inlawlawag pay ti maraem a sekretario a paborito nga estudiante ni Pres. Arroyo, a saan a panang-subsidize kadagiti mannalon a Vietnamese ti panagangkat ti pagilian iti bagas kadakuada no di ket tapno maaddaan iti umdas a suplay ti bagas kadagiti umili ditoy pagilian.

Ngem iti biang ti maysa a senador a dati met a dadaulo iti Departamento ti Agrikultura saan a solusion ti importasion ti bagas para iti pannakaited iti mabayag a seguridad iti taraon ti pagilian nupay makaited daytoy iti apagbiit a tulong iti pannakanayon iti suplay ti bagas ti pagilian.

Iti nalawlawag a pannao, kaarig ti band-aid solution daytoy ar-aramiden ti gobierno a mangsulnit iti pagkuranganna iti bagas babaen ti panagangkatna iti sabali a pagilian. Agpayso, apagapaman a pakabang-aran ti ipaay ti panagangkat iti bagas ngem saan a mapunas ti problema ti panagkisang daytoy a taraon iti lamisaan ni Pinoy. Agtultuloyto latta daytoy a problema ti gobierno iti panagtulid ti panawen no saanna nga ikkan iti naan-anay nga imatang.

(Adda tuloyna)