PITIK: Panagpatrolia dagiti polis, nasamsamay a pangontra iti krimen (Umuna a paset)

Napapanawen ti resolusion nga impasa ti sangguniang panlalawigan ti Ilocos Sur a mangidagadag kadagiti local chief executive a mangipasa iti ordinansa a mangbilin kadagiti bangko, pawnshops, money changing shops ken dadduma pay a dadakkel a  negosio a mangipasdek iti video monitoring devices iti ruar ken uneg ti pasdekda.

Mamatikami a makatulong daytoy a mamagsarimadeng kadagiti managdakdakes nga agisayangkat iti dakes a panggepda agsipud iti kaaddada a kasla pannakamata  a mangsipsiput iti asinoman a sumrek ken rummuar iti establisimiento.

Ngem iti panagkitami, saan nga umdas dagiti monitoring devices a manglapped kadagiti managdakdakes a mangiwayat iti planoda a panagtakaw, panaghold-ap, panagdukot ken dadduma pay a krimen.

Ditoy Vigan City, addan dagiti naipasdek a tele-eye kadagiti strategic places iti siudad ngem nakaladladingit nga adda latta dagiti mapasamak a panagtakaw, panaghold-ap, panagdukot ken panagsibbarut kadagiti bag ken selpon.

Itay laeng nabiit, iti sanguanan ti tiendaan publiko, linuktan dagiti di pay nabigbig a mannanakaw ti kotse ti asawa ti maysa a konsehal a nakapukawan daytoy iti gamengna.

Sabali laeng ti pannakatakaw ti maysa a pagtagilakuan ket intaray dagiti uppat a mannanakaw ti bag ti akinkukua a nakapukawanna iti P80,000 ken dokumento.

Sabali pay ti pannakatakaw ti maysa a souvenir shop iti Heritage Village a nakaitarayan ti selpon ti aglaklako, naglakuan ken sumagmamano a souvenir items ti shop.

Naisayangkat ti pannakalukat ti kotse ti asawa ti konsehal iti sanguanan ti tiendaan publiko iti tengnga ti aldaw a kumunolkunol dagiti aglabas a tattao.

Kasta met a tiempo ti kaadu dagiti aggatang idi naitaray ti bag ti baket nga akinkukua iti pagtagilakuan ken ti selpon, naglakuan ken souvenir items iti shop iti Heritage Village.

Maymaysa ti kayat a sawen dagitoy a pasamak: naturtured itan dagiti mannanakaw a mangiwayat iti dakes a panggepda uray iti katengngaan ti aldaw ken kaadu dagiti tattao iti aglawlaw.

Apay a kasta? Posible a dakdakkel itan ti panagtalekda a dida matiliw gapu  ta naplano  ti panagtakawda agraman ti panaglibasda.  Wenno matiliwda man, dagus met la a maruk-atanda agsipud ta iruar ida ti sindikato a nakaikappenganda.

Ti kadaksan, posible a tagibassitenda ti kabaelan dagiti polis a mangtiliw kadakuada.

Masiriben  dagiti managdakdakes. Naannayasen ti panangipakatda iti planoda ket maaramidda ti panggepda iti apagkanito laeng. Naplanoda metten ti panaglibasda ken posible nga adda pay maikadua a planoda no adda pagkibaltangan ti operasionda.

Mainaig iti panagtakawan iti maysa a pagtagilakuan iti public market, apagbiit a naiwayat dagiti suspetsa ti planoda.

Bayat ti panagingagatang ti dua wenno tallo a kakaduada, sabali ti umar-arubayan nga agsipsiput ket iti apagdarikmat a panagliway ti tindera wenno akinkukua iti pagtagilakuan, nakasakasdan ti puntiriada nga itaray.

(Adda tuloyna)