Footer

PITIK: Pannakaawat, saan a pannusa ti kasapulanda

Indagadag ti maysa a kabarbaro a direktor ti Baguio Police Office (BCPO) ti pannakaamendar ti juvenile justice law tapno maibaba ti tawen ti accountability dagiti menor de edad no makaaramidda iti maikaniwas iti linteg.

Insingasing daytoy ni Police Senior Supt. Wilfredo Franco, director ti BCPO,  gapu iti kunana a pammaliiwna nga umub-ubing dagiti aglabsing iti linteg sana innayon a mamati nga adu a law enforcers ti umanamong iti daytoy a sentimientona.

Iti sabali a bangir, ayonan dagiti konsehal a maamendar  ti linteg tapno maibaba ti kriminal a liabilidad dagiti menor de edad iti 12 a tawen, manipud iti 15 a tawen.

Uray ti bise mayor ti Baguio City Daniel Fariñas a maysa a dean iti College of Law iti University of Baguio ken Konsehal Richard Cariño, maysa met nga abogado, imbatadda a rumbeng a mausig iti korte dagiti menor de edad uray minor offense laeng ti naaramidda.

Ngem nainkalintegan wenno maikanatad kadi a maamendaran ti juvenile justice law tapno maibaba ti tawen ti criminal liability dagiti menor de edad nga aglabsing iti linteg?

Saanmi nga ayonan dayta. Iti bukodmi a kapanunotan, “nadagsen” unay daytoy a proposal ti maysa a police official ken agtuturay ti siudad ti Baguio.

Kadakuada, masapul a maipakat ti linteg… uray menor de edad dagiti nakaaramid iti pagbasolan iti linteg. Iti paniriganda, saan a maisabsabali dagiti menor de edad iti pagtimbangan ti linteg ket masapul a madusada iti panaglabsingda iti linteg.

Iti daytoy a singasingda, umad-adu ken lumawlawa ti sakupen ti maipakat a linteg agsipud ta saan laengen a dagiti agtawen iti 15 ti maipakatan iti pannusa no di pay dagiti agtawen iti 12 agingga iti 14 no adda  naglabsinganda iti linteg.

Saan a mailibak nga adu dagiti menor de edad a naikursong iti pagbaludan a kalaokda dagiti napeklan a kriminal, rapists, mannanakaw, ken dadduma pay a dakes  a “ruot” ti kagimongan, kasupanget iti probiso iti juvenile justice law a naputar a mangsalaknib iti kalinteganda a menor de edad.

Iti daytoy a singasing, ad-adda nga umilet dagiti pagbaludan kadagiti menor de edad a rebbengna a saan a ti pagbaludan ti tungpalda no di kadagiti rehabilitation center tapno maaturda ti kinataoda ket iti iruruarda, agbalinda a nalinteg  nga umili.

Iti bukodmi a biang, saan a ti pannakaipakat ti natangken a ngipen ti linteg ti solusion kadagiti krimen ken dadduma pay a paglabsingan iti linteg nga isayangkat dagiti menor de edad.

Saan a nadagsen a pannusa kas intuding ti linteg ti kasapulanda no di pannakaawat. Saan a pannakaikursong iti pagbaludan ti agas iti “biddut” a naaramidda iti gimong ken iti linteg ti tao ti sungbat iti panagbalbaliwda no di babaen ti pannakaibalayda kadagiti rehabilitation centers tapno maaturda ti kinataoda, masursuruanda nga agbiag a kas nasayaat nga umili ken maikkanda iti gundaway a mangabaruanan no addadan iti ruar.

Iti bukodmi a panirigan, adayo a nalaklaka a mulien ken aturen ti maysa a tao no naganus pay ngem ti maysa a napeklan a “dakes a ruot” nga ad-adda a pinatangken ti saan a pannakaited ti pannakaawat kenkuana iti panawen a kinaganusna a kasapulanna ti pammateg ken panangilala manipud iti gimong a paggargarawanna.#