PITIK: Party list system: maab-abuso pudpudno nga intension ti linteg (Tuloyna)

Kas nadakamat iti napalabas nga isyo, adda dagiti party list groups a masuspetsa a suportado wenno parupa ti Malakaniang tapno ad-adda a pumigsa ti partido ti administrasion iti akimbaba a benneg ti pagpandayan-linteg.

Dagitoy a party lists ti puntiria ti Kontra Daya ken dadduma pay a grupo a paikkat wenno padiskualipika ti akreditasionda tapno saanda a mairaman kadagiti pabutosan iti eleksion.

Idi eleksion idi 2007, sumagmamano a party lists ti masuspetsa nga inesponsoran ti Malakaniang agsipud ta nainaganan dagitoy iti maysa a nalimed a memorandum a mapapati a naggapu iti Opisina  ti External Affairs ti Malakaniang a kumidkiddaw iti budget a P5.5 milion a maaramat dagiti nadakamat a grupo para iti kampaniada.

Nadakamat iti memo ti grupo nga Agbiag Timpuyog Ilokano (AGBIAG), Babae para sa Kaunlaran (BABAE KA), League of Youth for Peace and Development (LYPAD), ken Kalahi Advocates for Overseas Filipinos (KALAHI).

Malaksid kadagiti naagapad iti ngato, nangipila pay ti Kontra Daya iti petision iti Comelec para iti pannakadiskualipika dagiti nominees ti BIDA, A-IPRA, ken Kasangga.

Pinetisionan ti Kontra Daya a madiskualipa da Sheryl Genuino-See, Johnny Tan ken Lamberto Barbin a nominees ti Batang Iwas Droga (BIDA), Teodorico Haresco ken Eugenio Jose Lacson ti Kasangga ken Eugenio Insigne ti Agapay ng Indigenous Peoples Rights Alliance Party-lists ti A-IPRA.

Kinuna ti Kontra Daya a nabaknang a negosiante ni Genuino-See ken anak ni Efraim Genuino, chairman ti Philippine Gaming Corporation (PAGCOR) a kukua ken kontrolado ti gobierno a korporasion nga alegasion a mangpunpundo iti kampania ti BIDA; dakkel a negosiante ni Tan ken miembro ti Board of Directors ti Philippine Postal Savings Bank, kukua ken kontrolado ti gobierno nga adda iti babaen ti Philippine Postal Corporation.

Iti sabali a bangir, kuna ti Kontra Daya a saan laeng a nainbolbar ni Haresco iti panagpatakder iti rangtay iti babaen ti President’s Bridge Program, kameng pay ti sumagmamano a kompania; idinto a nagtaktakem a mayor ni Lacson iti San Carlos City, Negros Occidental, banag a saanda a kaagpang dagiti babassit a negosiante a pagparparangenda nga ibagianda.

Mainaig met iti A-IPRA, dati a chairman ti National Commission on Indigenous Peoples, maysa nga ahensia a naiyapiring iti Opisina ti Presidente ni Insigne. Adda alegasion nga idi panawen nga inturayan ni Insigne ti NCIP, nababalaw gapu kadagiti pannakalabsing dagiti kalintegan dagiti indigenous nga umili.

Sabali pay a grupo, ti Kabataan Party List, ti nangkiddaw iti Comelec iti panangwaswasna iti akreditasion dagiti party lists a kunana nga adda iti “bak-ap” ti Malakaniang ken saanda a pudpudno a mangibagi kadagiti maipakpakannigid a sektor ti kagimongan.

Karaman ditoy ti 1-UTAK, A TEACHER, AHON, ALIF, APO, APOI, Aangat Tayo, A IPRA, APEC, AVE, BIYAHENG PINOY, BUTIL, COOP-NATCO, TUCP, ken Veterans Freedom Party.

Kangrunaan a rason ti Kabataan Party List a kasapulan a marebio ti akreditasion dagiti nadakamat iti ngato a party lists gapu ta saan a pudpudno nga ibagian dagitoy dagiti maipalpalikud a sektor.

Taldiapantayo man dagiti nominee dagitoy a party lists a di nakalusot iti natadem a mata ti Kontra Daya ken dadduma pay a grupo a kritiko ti administrasion Arroyo.

1-UTAK – Energy Sec. Angelo Reyes;   A TEACHER or ABAKADA – Education Sec. Jesli Lapus; AHON – Director of Labor and Employment Information and Publication Service Nicon Fameronag; ALIF – dati a Muslim Affairs Executive Director Acmad Tumawis; APO1 – DILG Usec. Melchor Rosales; ken Aangat Tayo –  Philippine International Trading Corp Usec. Teddie Elson Rivera.

No saggaysaen dagiti nominees dagitoy a party lists, makita a nagbalinda nga opisial ti gobierno iti babaen ti administrasion ni Pres. Arroyo.

Saan ngarud a mababalaw ti Kontra Daya ken dagiti dadduma pay a party list groups a mangakusar a suportado dagitoy ti Malakaniang.

(Adda tuloyna)