PITIK: Party list system: maab-abuso pudpudno nga intension ti linteg (Tuloyna) Salvador A. Espejo

Inannugot ti Commission on Elections a ti kaawan ti pagannurotan iti eleksion mainaig iti party list ti makagapu a mapalubosan dagiti tattao a mangibagi kadagiti marginalized a grupo uray no saanda a kakappeng kadagitoy a sektor.

Madakamat ditoy nga idi naipila iti Korte Suprema ti kaso ti Ang Bagong Bayani-OFW maikontra iti Comelec, kinuna ti korte a masapul nga ibagian ti nominees dagiti marginalized ken underpresented sectors.

Ngem segun ken ni Comelec Commissioner Rene Sarmiento, saan a nalawag no ania ti kayat a sawen daytoy.

“Siya ba ay advocate or siya ba ay isa sa kanila? Walang existing guidelines, ganun ka-general yung ating batas,” kinuna ni Sarmiento.

Idi Mayo 7, tallo nga aldaw sakbay ti eleksion, dinismis ti Comelec nga awan ti merito ti  impila a kaso da Liza Maza ken Satur Ocampo ken ti party list a Bayan Muna a pannakadiskualipika ni Diputado (idi) Juan Miguel “Mikey” Arroyo a kas nominee iti Ang Galing Pinoy gapu ta saan a pudpudno nga ibagianna dagiti security guards ken tricycle drivers.

Kinuna ti Comelec nga ikut ni Arroyo amin dagiti kualipikasion para iti party-list nominees kas intuding ti Section 9 ti Republic Act 7941 wenno ti Party-list System Act.

Kitaentayo dagitoy a kualipikasion:

*masapul a natural born citizen ti pagilian

*rehistrado a botante

*residente iti Pilipinas iti saan a nakurkurang ngem makatawen

*makabasa ken makasurat

*bona fide member ti partido a tarigagayanna nga irepresentar iti saan a nakurkurang a 90 nga aldaw sakbay ti eleksion

*agtawen iti 25 iti kaaldawan ti eleksion.

No basaen dagiti nadakamat a kualipikasion ti maysa a party list nominee, uray nababa ti adalna nga umili, nalakana laeng a magun-od dagita. Anianto la ketdin ken ni Arroyo a nagbalin pay a diputado iti maikadua a distrito ti Pampanga wenno dagiti nangangato nga opisial ti gobierno?

Segun pay iti Comelec, bona fide member ni Arroyo iti Ang Galing Pinoy party list manipud pay idi November 2009 ket aktibo a nangsuporta ken nangiduron kadagiti proyekto ken programa ti partido.

Maipalagip ditoy nga agdama a diputado iti dayta a panawen ni Arroyo a mangibagi iti maikadua a distrito ti Pampanga. Idi sakbay nga agtapos ti tawen, maal-alimadmaden ti panagkandidato ti inana para congresswoman gapu iti masansan nga isasarungkarna iti daytoy a distrito.

Napatalgedan daytoy a suspetsa dagiti kritiko idi inwaragawag ni Mikey Arroyo a sidadaan nga agpalikud no agkandidato ti inana iti distrito nga ibagianna.

Ngem ti saan nga ammo dagiti tattao, adda gayamen maysa a party list group a madadaan a mangsippaw kenkuana a kas nominee tapno makasubli met laeng iti Kongreso, daytoy ti Ang Galing Pinoy a grupo dagiti traysikelan ken dagiti security guards.

Ngem iti biang ti Comelec, addaan ni Arroyo iti kalintegan nga agbalin a nominee ti Ang Galing Pinoy a kas kadagiti dadduma a miembro ti partido, banag a saan a maaklon dagiti kritiko gapu iti alegasionda a peke daytoy a party list group ken saan a nakapapati a ti maysa a kas ken ni Diputado Arroyo ket ibagianna dagiti traysikelan ken security guard.

Iti daytoy a punto, saan a makalisi ti Comelec kadagiti pammabalaw agsipud ta dina iningetan ti pananggasagasna kadagiti nominees, no di laeng dagiti grupo ti party list.

Pagarigan laengen ti Ang Ladlad party list, sinagat ti Comelec agsipud ta ibagian daytoy dagiti bakla, lesbian, bisexual wenno transgender a kunana a mangkankanunong iti immoralidad a mangpagura kadagiti Kristiano ken Muslim.

Nabigbig laeng daytoy a lehitimo a party list idi sinarurongan ti Korte Suprema ti petision a maikkan daytoy iti akreditasion kas party list group ken makakualipika a paidasig iti eleksion.

(Maigibusto)