PITIK: Siit iti Karabukob ti Asia (Maikapat a paset)

URAY idi sakbay a naaprobaran ti baseline bills iti Kamara ken iti Senado, inakusaranen ni Sen. Antonio Trillanes IV ti administrasion Arroyo iti panangsabotahena kadagitoy pending a gakat iti Kongreso mainaig iti depinision ti teritorio ti pagilian.

Imbatad ni Trillanes ti suspetsana a panangpanggep ti administrasion ni Pres. Arroyo ken dagiti kaaliadona iti Kamara a mangkutingting iti gakat nga agtungpal iti pannakaimameg ti nasional nga interes tapno laeng “maakomodar ti interes ti maysa a ganggannaet a pagilian”.

Iti sabali nga interbiona iti media, innaganan ni Trillanes ti ganggannaet a pagilian a ti China, a kunana a mangpres-pressure iti gobiernotayo tapno mapukaw ti claim ti pagilian iti Kalayaan Island Group ken iti Scarborough Shoal.

No patien ni Trillanes, saan a kayat ti administrasion Arroyo a mapagura ti China gapu kadagiti nagkaadu a proyekto daytoy iti Filipinas.

Ad-adda a pimmigsa ti suspetsa ti senador idi naipasubli ti House Bill No. 3216 iti committee level iti baet a naipasan ti gakat iti maikadua a pannakaibasana idi Disiembre itay napan a tawen.

Iti HB 3216 a pinutar ni Diputado ti Cebu Antonio Cuenco, rinekognisarna ti Kalayaan Islands Group a kas maysa a local government unit.

Iti sabali a bangir, inaprobaran ti Senado ti sabali a bersion, ti pannakaibilang ti KIG ken Scarborough Shoal a kas “rehimen dagiti isla.”

Uray ni Sen. Aquilino Pimentel Jr., binabalawna ti pannakaikkat ti Kalayaan Islands Group ken ti Scarborough Schoal iti archipelagic baselines kas singasing ti administrasion.

Iti biang ni Pimentel, mamati a ti Malakaniang ti adda iti likudan ti pannakaisubli ti gakat ni Cuenco iti committee level nupay naipasan iti maikadua a pannakaibasana agsipud ta kayatna a pagkalmaen ti China a kas nadakamaten, gapu ta kontraenna ti pannakairaman dagiti tagtagikuaenna nga isla a kas paset iti teritorio ti Pilipinas.

Kinuna ni Pimentel a “mabuteng ni Arroyo a mapagurana ti China agsipud ta adda “komitmentna nga economic ken business packages” ditoy pagiliantayo.

Iti sabali a bangir, linagidaw ni Trillanes ti di panaguyas ti Senate Bill 1467 a bukodna a gakat mainaig iti baselines ti pagilian nga impilana pay laeng idi Agosto 2007 agsipud ta tinugawan ti Foreign Relations Committee iti agarup innem a bulan.

Iti gakat nga indatag ni Trillanes iti Senado, nairaman ti Scarborough Shoal iti archipelagic baselines.

Iti dayta nga inaramid ti Senado, kinuna ni Trillanes a maysa daytoy a “panangilako” iti pagilian.

Iti biang ni Trillanes, nakaro a pakadaksan ti pagilian iti pannakaikkat ti Scarborough Shoal iti baselines agsipud ta mapukawan ti pagilian iti kabaybayan a teritoriona nga aglawa iti aganay 14,500 square kilometers.

Kas nadakamat iti napalabas a paset daytoy a salaysay, magustuan dagiti mangngalap iti China a pagkalapan ditoy a paset agsipud ta nalames malaksid laeng a mapattapatta nga adda nakadulin a gas ken lana iti kabaybayan a saklaw daytoy nga isla.

Segun iti maysa nga otoridad, nabakbaknang pay ti Scarborough Shoal iti deposito ti gas ngem iti Kuwait.

No pudno daytoy, saan ngarud a nakakaskasdaaw nga adu a pagilian ti agpagus a mangtagikua iti daytoy nga isla.

(Adda tuloyna)