PITIK: State visit ti Presidente, panagburbor iti kuarta

Masansan a pakababalawan ni Pres. Arroyo ti panagbisitana iti sabali a pagilian. Kapaliiwan ngamin a kadagiti panagbiahe ti Presidente, tumuyutoy dagiti umipus kenkuana a kameng ti Gabinetena, negosiante a mangisaksakit iti administrasion ken dagiti agilinlinteg a nasinged a kaaliadona agraman dagiti asawada.

Ikalkalintegan ti Malakaniang a dakkel ti akem dagitoy iti pannakipatang ti gobierno kadagiti dadaulo dagiti pagilian a binisitada tapno mapasayaat ti langenlangen iti nagbaetanda ken makaawisda kadagiti dadakkel a kompania nga agibaut iti negosioda ditoy pagilian.

Iti biangmi, maysa laeng dagitoy a junket a nagburboran ti gobierno iti pirak. Pirak a nagtaud kadagiti umili babaen ti buisda. Ti makadakes, naisayangkat dagitoy a panagbisita iti panawen a karaman ti pagiliantayo nga agsagsagrap iti pinansial a krisis. Uray iti baet ti panangibanbando dagiti agtuturaytayo a natalged ti ekonomia ti pagilian, makunatayo a naapektaran iti dakkel ti pagiliantayo iti daytoy sangalubongan a problema.

Kadakami, rumbeng laeng nga agbisita ti Presidente kas paset ti pannakilangenna kadagitoy a pagilian kasta met nga ilakoda ti pagiliantayo kadagiti dadakkel a negosio bareng no maay-ayoda nga agibaut iti puonanda ditoy pagilian. Ngem nasken kadi a tumuyutoy dagiti ikuyogna a pagduaduaan met nga adda maitulongda kadagitoy a mission ti gobierno malaksid laeng ti kinaasidegda iti Presidente?

Iti biangmi, maysa daytoy a panagimbubulsek iti agdama a panagraira ti kinapanglaw iti pagilian. Imbes a maipaay ti nagastos dagitoy alipores ti Presidente (nagtaud kuno iti bulsada ti gastosda) a simmurot iti junket para iti pannakaidur-as ti panagbiag dagiti marigrigat nga umili, saan ta binurborda laeng iti panaglang-ayda iti sabali a pagilian a nagtagimaskara a kas state visit.

Segun iti report ti Commission on Audit, agdagup ti nabusbos iti panagbiahe ti gobiernotayo iti P5.91 bilion idi 2007 ket nakagasto ti Opisina ti Presidente iti P693 milion. Iti daytoy a gatad, P96 milion ti nabusbos iti lokal a panagbiahe ti Presidente ken P594 milion iti panagbisitana iti sabali a pagilian.

Segun pay iti COA report, manipud iti 2002 agingga iti 2007, agdagupen iti nasurok a P2 bilion ti kadagupan a nabusbos ti Opisina ti Presidente iti panagbiahena.

Isardeng koman ti Presidente ti naynay a panagbisitana iti sabali a pagilian aglalo iti daytoy a tiempo ti kinarigat ti panagbiag. Aramatenna laeng koman ti pondo para iti pannakaipaay kadagiti livelihood projects, pannakaparnuay dagiti panggedan, pannakaipaay iti nasaysayaat a serbisio ti salun-at, edukasion ken dadduma pay a mangidur-as iti panagbiag dagiti umili.

Ad-adda pay a raemen dagiti umili ti maysa a Presidente nga adda iti sibayda iti tiempo ti rigat a saan ketdi a mapan agburbor iti kuarta iti panagbisitana iti ganggannaet a pagilian nga awan met ti maiyawidna a kongkreto no di kaadduanna a commitment laeng para iti pagsayaatan dagiti iturayanna.#