Taldiap iti sangapulo a tawen a panagdaliasat ti Tawid News Magasin (Maudi a paset)

Wen, iti panangtaliawmi iti napalabas, adu dagiti rumbeng a pagyamananmi iti agtultuloy a panagdaliasat ti Tawid News Magasin iti baet dagiti krisis a sangsanguen dagiti pagilian iti sangalubongan.

Umuna a pagyamananmi ti asawa ken dagiti annakmi gapu iti suporta nga intedda kadakami bayat ti panangilangoymi ti pagiwarnak kadagiti immuna a dua a tawen manipud iti naipasngay. Kadagitoy a tiempo, nabingay ti panawenko kadakuada – no palausen ti manarita, ad-adu pay ketdi ti panawen nga impaayko iti pagiwarnak ngem kadakuada.

Pagyamananmi ta mannakaawatda ket solidoda nga adda iti likudanmi idinto nga adda dagiti gundaway nga uray ti pinansial a kasapulanda ket diak payen maited agsipud ta maipan metten iti imprenta gapu iti kakisang dagiti pamastrekan ti pagiwarnak.

Kadakami, adayo a napatpateg ti pannakapnek ngem iti kuarta. Napatpateg ti pannakapnek a mariknam no daydiay nagbannogam, nagling-etam ken nangiburayam kadagiti sakripisiom ket in-inut nga agsantak, kas iti rosas a naitukit a sanga ngem babaen ti pannaraken ti nadungngo a dakulap, nagsaringit, nagsanga ket simngay dagiti sabongna a mangidarnap iti nagpaiduma nga ayamuom iti aglawlaw.

No sadino ti yan ti pagragsakam, isu ti direksion a turongem, kuna ti maysa a masirib. Sinurotmi dayta a kapanunotan ken prinsipio ket maibagami ditoy a saankami nga agbabawi no di ketdi agyamankami ta ti kinamannurat ti nasurotmi a lubong. Iti daytoy a lubong, nariknami ti naisangsangayan a ragsak iti let-ang ti kinakisang, ti pannakapnek iti pannakakita iti pannakaipasngay wenno pannakaikur-it dagiti idea ken pampanunot nga agubbog iti kaunggan ti barukong.

Dagitoy ti insursuromi kadagiti annakmi. Dagitoy ti immulami iti panunotda. Pagyamananmi ta naipasagepsepmi kadagiti annakmi nga adda dagiti bambanag ditoy lubong a saan a magatadan uray linaksa a kinabaknang.

Kangrunaan nga agyamankami iti Namarsua a nangikawes iti sagudaymi kas mannurat. Kas mannurat, nasursuromi ti agpaliiw kadagiti mapaspasamak iti biag a mabalin a kadawyan laeng ken awanan kaimudingan iti panirigan ti maysa nga ordinario a tao, ngem no maikkanda iti naun-uneg a panangamiris ken panagimutektek, agbalinda a maregmeg ti balitok a mangited iti naburbursi a kaipapanan iti biag.

Ammomi pay ti agyaman uray kadagiti mangpadpadakes kadakami. Agsipud ta dagitoy ti mangiduron kadakami a mangpasayaat pay iti suratenmi. Dakami a natenneb iti pannakaupay ken pannakaitublak iti nasiit a desdes ti biag, saan a dagitoy ti lapped ken bangen agsipud ta adayo a dakdakkel dagiti balangan ken pannubok a naglasatanmi sakbay a nagtengmi ti agdama a kasasaadmi. No taliawenmi ti napalabas, dagiti nakaisangolanmi a pannakapaay ken pannakaitublak, kikitda laeng dagiti agdama a maibatbato iti sanguananmi.

Kunada: saanmo nga ibaga dagiti nagapuanam. Ipakitam babaen ti aramid.

Iti pannakadanon ti Tawid News Magasin ti maikasangapulo a tawenna, nalawag a matannawaganmi dagiti nagdalanan ti pagiwarnak. Nalawag met a makitami ti masanguananmi: namurumoran pay laeng kadagiti bato dagiti daliasenna a dalan, naipakuros dagiti napegges a karayan, ken narangkis dagiti bantay a sang-atenna.

Ngem ti makunami: umaddang latta ti Tawid News Magasin uray iti sanguanan dagitoy a balangan ken pakaitublakan ken pakalmesan. Ammomi a babaen ti pannarabay ti Mannakabalin, malasatanna amin dagitoy iti iyaaddang ti pagiwarnak a mangtalunton iti bukodna a kaikarian.#