Taldiap iti sangapulo a tawen a panagdaliasat ti Tawid News Magasin (Tuloyna)

Adtoy pay ti naggapu ken ni Vic Quitevis babaen ti emailna a [email protected] Krinitikarna ti pannakaaramat ti balikas a “wangwang” iti maysa a damag iti Tawid News a naikabit iti maysa nga trak nga agkarga iti basura.

Kuna daytoy kritiko ti Tawid News (saanmi met nga inedit): “Appo, ania man ti pinartuatyon a balikas a “wangwang”? Wangwang ket maysa a dakkel a lussot. Kasta kadi ti kayatyo a sawen a naikabit? Wenno ti kadi kayatyo a sawen ket daytay ramit a para wengweng weno aweng (siren)? Agpayso dagiti paliiw a maidaddadanes ti sao nga Iloco ditoy a pagiwarnak.”

Sumagmamano laeng dagita. Naruayda. Addada iti asideg nga umar-arubayan, agur-uray iti tiempo a makaliway ti Tawid News Magasin sadanto manen umatake barbareng no maibualda ti paramutna tapno saanen a makalung-aw pay.

Agnanayon ngarud a nakasagana dagiti adda iti likudan ti pagiwarnak a manglapped iti aniaman a panagpanggep a mangirarem iti daytoy a pagiwarnak.

Dimi ngarud maigawid ti saan nga umisem no mabasami dagiti kritisismo iti pagiwarnak. Ta nakadidillaw a naggapu ti komentario manipud iti maysa a mannurat a nainaig iti Tawid iti napalabas. Iti kastoy a klase nga agdillaw, uray typographical error, komentarioanna! Saan a ti pakabuklan a linaon ti pagiwarnak ti timbengenna no di dagiti babassit a biddut ti padakkelenna a dillawen.

Ngem kadakami, ibilangmi daytoy a ramen ken paset ti kinamannuratmi. Saanmi a paglibakan, adda latta dagiti mapalusotmi a biddut. Kasta ti maysa a pagiwarnak. Ta uray pay dagiti aginaldaw a pagiwarnak a namirit kadagiti proofreaders ken editors, adda latta dagiti makalusot a biddut.

Adda pay sabali nga am-ammomi a no agsarsarita, kunam no masirib unay. No adda iti ummong, ti la timekna ti tumtumpaw. Naaprobaran laeng ti sinopsis ti nobelana, inwarwaragawagnan ti “obra maestrana.” Ngem kas tay nagbilang iti piek a di pay napessaan dagiti itlog, “ibbong-maestra” met gayam ti sinuratna.

Sabagay, dagitoy a klase a tao ti mangmangted iti ramen ken ray-aw iti lubong ni mannurat. Dagitoy ti bullilising ti agsapa a mangted iti apagbiit nga isem iti nadagaang nga agmalem.

Adda pay dagiti gimmura kadakami gapu ta naituredmi nga imbaga dagiti pagkurangan ken pagkapsutanda kas mannurat. Sabali gayam ti nagawatanda iti panangkritikarmi iti gapuanan wenno sinuratda. Ta nangato ti panagkitkitada iti bagida. Panangipagarupda, nalaingdan nga agsurat. Tagidaksenda a magaraw ti sinuratda. Ngem no palausen ti manarita, adu ti sagursor dagiti sursuratenda ket ad-adu pay ti tiempo a mangkayas iti sinuratda tapno laeng mabalbalin nga ipablaak.

Iti Bannawag ken sabsabali pay a nasional a magasin ken pagiwarnak ti barometro no nagballigi ti maysa a mannurat. Saludsoden koma dagitoy agkunkuna a bangolan a mannurat iti bagida sakbay nga ibandoda nga aginlalaing ti editor a mangkuroskuros iti sinuratda: adda kadin naipablaakda, ket no adda man awan kadi ti naksay, nainayon wenno kasla makina a na-overhaul ti sinuratda ket ti laeng naganda ti saan a nakuti? Adda dagiti mannurat a saan a makaawat iti agdadata a kinapudno. Dida maawat (nangato ngamin ti pangibilbilanganda iti bagida) a mayarigda iti pulpol a buneng nga uray marunoten iti kaaasa, adda latta kunkuna ti tademna. Ngem kastay kunadan, makasugat ti kinapudno. Makagurada agsipud ta ti pudno ti imbagbagami.

(Adda tuloyna)