Taldiap iti sangapulo a tawen a panagdaliasat ti Tawid News Magasin (Tuloyna)

Ita, bayat ti panangsursuratmi daytoy, dimi magawidan ti saan a tumaliaw iti likudanmi, kadagiti panawen a naglasatan ti Tawid News manipud idi ininawmi ken iti panangikarigatanmi a mangilangoy iti sanguanan dagiti lapped ken kinakirang ti pondo tapno laeng makatakder a kabukbukodanna.

Ita, bayat ti panangtaliawmi iti napalabas, dimo ammo no kasano a nakalangoy ti Tawid News ken saan a naarinebneb kadagiti krisis a nangdalapus iti pagilian ken iti sangalubongan. Makunami a bunga daytoy iti nasayaat a pannakaimaton ti pinansial a paggastosanna ken iti saanmi a panangitulok a sumrek dagiti tattao nga agpampammarang a sumuporta iti pagiwarnak ngem addaanda iti sabali a panggep, ti pannakaidur-as ti bukodda nga interes.

Kinapudnona, adu dagiti kritiko ti Tawid News gapu ta adda dagiti dina napagustuan a tumipon iti pagiwarnak, kas contributing writer, kolumnista, wenno editor iti Iluko section.

Agingga ita, dagitoy ti masansan a mangkritkritikar iti Tawid News. Kadakuada, awanen ti nasayaat a maipapaay ti pagiwarnak. Kadakuada, kayarigan ti pagiwarnak ti maysa a nisnis a masapul a maipalladaw iti suli uray iti baet nga iti naminsan, adda met dagiti nagimbaganda ken nakaitaloan ti pluma ken naganda a kas mannurat.

Iti website ti Tawid News, masansan a makaawatkami kadagiti komento dagiti nangbisita wenno nagbasa iti pagiwarnak babaen ti internet.

Pagarigan daytoy naawatmi manipud iti maysa a Tomas Raguindin iti babaen ti e-mailna a [email protected] Mainaig daytoy iti damag maipapan iti panagsanay iti English proficiency.

Kuna ni Tomas Raguindin: “Appo banban ken alupasi met dagiti Ilocano a mabasa. Mapasayaat koma ti pannakaaramat ti saotayo ditoy a pagiwarnak.”

Dimi ammo no ania ti nagbatayan daytoy kritiko ti pagiwarnaktayo a nagkuna a “bamban ken alupasi” dagiti Iloko a mabasbasa iti Tawid. No kastoy ti panagkitkita daytoy a kritiko iti Tawid News, makunatayo ngarud a malalaki a mannurat daytoy. Sayang laeng ta naglemmeng iti nagan a Tomas Raguindin tapno kiddawenmi koma ti tulongna a mangpasayaat pay ti pannakaisurat dagiti Iloko a damag iti pagiwarnaktayo.

Adtoy pay ti maysa a naggapu iti maysa a Judilynn babaen ti e-mailna a [email protected] Kuna daytoy a kritiko ti Tawid News (saanmi nga inedit): “Who said that there is a “doctora” word in the English language? If a “puto:” maker is called “agputputo” how do you call a female “puto” maker? I thought that correct English usage is used in this magazine but it not. Ilocano language is also bastardized here.”

Inukagmi ti isyo a nakailanadan ti damag a nagtaudan ti kritikarna ket nakitami a saan met a naisurat iti English ti damag no di ket Iloko.

Kasta met a dimi maawatan no kasano a nabastardo ti lengguahe nga Ilokano.

(Adda tuloyna)