Taldiap iti sangapulo a tawen a panagdaliasat ti Tawid News Magasin

IDI kanikadua a tawen, maysa nga aglinawas (kuno) a pagiwarnak ti nagkiddaw iti maysa a regional trial court iti Ilocos Sur iti pannakaited ti akreditasionna tapno makaipablaak kadagiti special proceedings, summons, notice of foreclosures ken dadduma pay a pammilin nga aggapu iti korte. No ukagem ti pagiwarnak, makitam a nalatak a mannurat dagiti staff ti nasao a pagiwarnak.

Adda pay dagiti simmarsaruno a pagiwarnak a nagidatag iti petisionda para akreditasion, ngem saankami a nagpangadua a nangipila iti oposisionmi kontra iti petision dagitoy a pagiwarnak.

Adda pamkuatanmi a komontra iti iseserrek dagitoy a pagiwarnak.

Umuna, saan a pudno a rumrummuar a linawas dagitoy a pagiwarnak iti baet ti panangibando ti editor ken publisher a premiado ti pagiwarnakda (banag a mapagduaduaan ta awan ti maibilang a premiado nga aglinawas a pagiwarnak iti Ilocos Sur ken uray kabangibangna a probinsia ken siudad agsipud ta awan matandaananmi nga awarding body wenno gunglo nga agit-ited iti pammadayaw ditoy probinsia.)

Maikadua, nakabaseda iti sabali a probinsia ta masarakan ti prinsipal a business officeda ket maikontra daytoy iti guidelines nga impaulog ti Korte Suprema mainaig iti akreditasion dagiti pagiwarnak.

Ngem gapu iti daytoy nga inaramidmi, nabatokami kadagiti pammabalaw. Nagulimekkami koma kano lattan ta “awan met sabsabali” yantangay kaduami met laeng iti propesion dagiti nagipila iti petition for accreditation. Awan kano ti pannakikaduami. Ti la kano bukodmi nga interes ken pagimbagan ti nangiduron kadakami a mangsupiat iti iseserrek dagitoy a pagiwarnak iti probinsia.

Kinapudnona, bayat ti panagdaliasat ti Tawid News Magasin iti unos ti sangapulo a tawen, adu dagiti naukkonna a gagayyem. Dagitoy dagiti saan a nagkitakit a nangtultulong iti pagiwarnak kadagidi panawen nga agsursuro pay nga umaddang iti tay-ak ti panagiwarnak. Dagitoy dagiti di nagpangadua a nangsappuytot iti pagiwarnak kabayatan a kakaasi nga aglanglangoy tapno makaballasiw iti karayan ken makasalpa iti igid a pagunoranna a kumamang iti desdes nga umuli iti tapaw ti turod.

Saanmi met nga ilibak nga adu dagiti napasugkian ken napagura ti Tawid News Magasin (nangruna ti publisher) bayat panagdaliasat ti pagiwarnak gapu iti napinget a panangipukpukkawna ti kaadda koma ti propesionalismo iti panagiwarnakan ken iti panangkontrana iti panagraira dagiti warnakan a kaarigda ti bullalayaw nga agparang- agpukaw, lumidem-rumaniag, kumugtar-agkuripagpag.

Dagitoy dagiti pagiwarnak a no awanen ti makalapanda nga anunsio wenno “praise release” manipud kadagiti politiko ken negosiante, aglumenda ket sadanto manen rummuar no madanon ti panagkasangay dagiti nangato a turayen ti probinsia.

Adda pay dagiti kameng ti media nga agsuratda iti damag wenno artikulo maipapan iti politiko sadanto mapan singiren daytoy.

Kinapudnona, maysa a retirado a politiko iti ganggannaet a pagilian a nakapatpatangmi ti nagkuna a nasdaaw idi mangangay iti presscon mainaig iti yaayda ditoy probinsia mangisayangkat iti maysa a medical mission agsipud ta dinawatan dagiti dadduma (dagiti marmaruam, saan nga amin) a naayaban a reporters ken writers iti para “gasolina.”

Kas kameng ti media, adu a klase ti mannurat ti nakalagudlagudmi. Adda dagiti am-ammomi a mannurat nga idi “agrigrigat” pay la ti Tawid News Magasin, sangkalibbida nga agpatingga laeng iti sumagmamano a bulan, saanton nga agrangpaya wenno agsanga. Idi agbalinen nga aglinawas a pagiwarnak, nagbaliw ti pannakilangenda. Umar-arubayandan. Kastay kunada: No agbungan ti kayo, adun dagiti mangtangad. Adu ti mayat a makipagburas iti apit.

(Adda tuloyna)