Adu dagiti gagayyem ngem manmano daytay maibilang a pudpudno a gayyem.
Saanmo a makita daytoy a gayyemmo iti sibaymo bayat ti kaaddam iti
tapaw ti balligi wenno iti let-ang ti nam-ay. Awan a makitam iti
sirkulom a gagayyem kadagiti pasken, parambak ken ragragsak. Ngem iti
tiempo a kasapulam ti tulong ken pammaregta, dita a makitam daytoy a
gayyem, sidadaan a sumaranay, agserbi ken mangidaton pay uray iti
biagna para kenka.
Iti sanguanan ti maysa a pasamak a dandani nangkeltay iti maysa nga arapaap ken naraniag a masakbayan, di la ketdin immarubayan ti lalaki a namnamaen ni Rose a sumaranay iti tiempo a kasapulanna ti kaaddana uray apagkanito laeng, ti pammatibker ken panangipamatmatna iti sangkabassit a panangilala kas maysa a gayyem.
Ditoy ti nakapaneknekak nga adda gayam dagiti tao a nalupoy iti sanguanan dagiti pannubok ket agsanudda agsipud ta mamatida a dida kabaelan a sarangten daytoy. Kasta met nga adda dagiti agayat a seknan ti buteng ken amak kadagiti gundaway a maipasungalngal ti ayatda iti pagduaduaan a kasasaad.
(Kinapudnona, daytoy a situasion ti nagbalin nga idea iti pinutarko a sarita a naipablaak iti maysa a linawas a magasin. Pinauluak daytoy iti “Yanmo idi kasapulanka?” Ngem ituloytayonto daytoy iti sabali a paset.)
Sumungsungadak pay laeng, saanen nga agsaludsod dagiti nars iti information desk, ibagadan nga agtuloyak lattan iti kuarto ni Rose.
(Idi rimmuaren ni Rose, nadakamatna a tagtagiuray dagiti nars no sumarungkarak kenkuana. Anta gayam, sublatenda a basaen dagiti pocketbooks a gatangek bayat ti kaawan ti pasienteda.)
Kalpasan ti bakasion iti Paskua ken Baro a Tawen, naggawid ni Rose iti Namitpit tapno ditoy ti pagpaungaranna. Iti balay ti ikitna ti nagdagusanna, saan a ti Bucnit a yan ti balayda ta adayo iti dalanen ti lugan. Nakasaklay tapno adda katulonganna a magna.
Iti malem kalpasan ti klasek, dumaw-asak iti dagusna. In-inut a napunas ti irteng iti bibigna. Di mabayag, naisem met laengen. Mabalin a naawatnan ti napasamak kenkuana. Posible met a naiwagatnan ti maysa a di pangnamnamaan nga ayat. Aniaman kadagitoy, kayarigda ti puris a naasut iti kaunggak.
Kabayatan dagita a panawen, in-inut a naginnasideg ti riknami. Awan ti balikas a naisawang, ngem dagiti tignay ti nangiparipirip nga adda naun-uneg a rikna iti nagbaetanmi. Nakitak dayta iti isemna no kasdiay a taldiapannak no sumungadak iti dagusna wenno damagenna no kasano ti aldawko iti klasek. Nariknak dayta kadagiti babassit a kuddotna iti bakrangko no kasdiay a sutilek wenno agestoriaak iti makapakatawa. Nariknak dayta no kumpet iti takiagko no kasdiay a mapankami iti pannakaberanda ti dagusna wenno no rummuarkami nga agpaangin iti baba wenno iti nakapsut a piselna iti dakulapko no kasdiay nga agpakadaak iti naladawen a sardam.
Kangrunaan a nakitak dayta iti mata ni Rose idi imbagak nga aggawidakon iti Vigan nga adda posibilidadna a saannakon nga agsubli pay gapu ta naterminaran ti serbisiok ken iti panagpayapayna iti paraanganda idi lumuganak iti six-by-six a trak.
Babassit dagitoy a banag ngem umdasen kaniak. Maysaak a mannurat ket uray saandan a maibalikas, ammok ken mariknak ti naun-uneg a kaipapananda.
Kuna ti maysa a mannaniw: adda tibong dagiti umel a darikmat!
Wen, uray iti let-ang ti maysa a trahedia, maipasngay met ti maysa nga ayat, natibtibker, nakasagana nga agsakripisio ken makirupak iti aniaman nga allawig iti masakbayan!#