: PITIK: Taldiap-Napalabas -5 (Tuloyna) | Tawid News Magazine - Weekly Ilocos News 📰

PITIK: Taldiap-Napalabas -5 (Tuloyna)

Baro a biag kada Rose ken ni Baket Carda, kuna dagiti nakalugananda, ta
nakalasatda iti baet a nauneg ti derraas a nakaikarangugongan ti
luganda.

Segun kadagiti nakalasat, agsalog ti lugan idi napukaw ti prenona. Dagiti lallaki, dagusda a timmapuak sakbay a natnag ti lugan iti derraas.

Naikuyog da Rose ken ti inana iti lugan. Naammuak (kalpasan ti sumagmamano nga aldaw) a natinnag ni Rose iti maikadua a panagtulid ti lugan iti bakras ti bantay ngem adda natangken a banag a nangliddit iti kanawan a luppona. Ngem naikuyog ni Baket Carda iti panagtulid ti lugan agingga iti baba.

Adu ti nasdaaw ta nakalasat ti baket iti baet nga awan ti nagserserbian ti lugan. Ngem patiek nga adda pay sabali a plano ti Namarsua nga iringpasna ditoy rabaw ti daga gapuna a dina innala.

Awan pay ti ambulansia iti daytoy a lugar kadagidi a tiempo ket dagidagi ti inaramat dagiti immarayat a nangikabilanda kadagiti agina sada intaray iti ospital iti Cervantes.

Manipud iti Cervantes, naitaray da Rose iti Baguio General Hospital. Iti pakpakauna nga eksamen, natukkol ti tulang iti luppona.

Ditoy ti nakapaneknekan a no sangbayannaka ti pudno nga ayat, saanka nga agpangadua a tumaray a mapan iti sibay ti ay-ayatem tapno itedmo uray sangkabassit a pammaregta wenno pammigsa a mangibaklay iti sagsagabaenna.

Diak managkararag ngem iti dayta a kanito, nangitanamitimak iti sumagmamano a balikas a nangdawatak iti Namarsua a maisalakan koma ni Rose iti daytoy a pannakaaksidenteda nga agina.

Saan a dimmuko iti panunotko ti posibilidad a maputdan ni Rose iti saka wenno agbalinton a pilay iti agnanayon.

Ti ket dinawatko, agbalin koma a napigsa ti pakinakemna, maaddaan iti kinatibker a sumango iti aniaman a dakkel a problema a gubuayen ti pannakaaksidentena.

Sumagmamano a lawas ni Rose iti BGH.  Nakabitan iti landok ti tulang iti luppona . Agingga ita, kasla diak mamati nga iti kauneg ti nagtulidan ti lugan sakbay a natinnag ken naitupa ti luppona iti bato, saan a naparpar ti tulang iti luppona. Iti resulta ti x’ray, kasla rinugos ti ragadi ti tulangna, awan uray ania a sagursorna.

Milagro, nakunada. Mabalin a pudno dayta. Ngem patiek agingga ita a nabileg ti kararag. No naimpusuan ti panagkamangmo iti Dios, arakupennaka a kas iti naiwawa a karnero.

Idi adda pay iti ospital, lumuasak iti Baguio City tapno sarungkarak ni Rose iti kada Sabado wenno Domingo a kaawan ti klase. Dumagasak metten iti libro a pagbasaanna ta ammok a nautoy ti nakailad lattan a nakangato ti maysa a sakana.

Ken maysa pay, ammok, nupay kupkupikomanna iti unegna, a mabalin nga adda naun-uneg a saem a sagsagabaen ni Rose. Dina ngata ammo ngem naisalpika naminsan ni Manong Baring nga aggayyemda iti maysa met laeng a nangisuro iti Namitpit Elementary School.

Iti masansan a panangsarungkarko kenkuana iti ospital, diak pulos nakita daytoy gayyemna a timmammidaw iti ospital.

       (Adda tuloyna)