: PITIK: Taldiap-Napalabas -5 | Tawid News Magazine - Weekly Ilocos News 📰

PITIK: Taldiap-Napalabas -5

Nadakamatko
iti kallabes nga iti panaggianko iti pito a bulan iti Quirino, Ilocos
Sur ti ibilangko a kamarisan a paset ti biagko.






Umuna, ditoy ti ibilangko a
nagbukaran ti kinamannuratko. Agpayso, idi estudianteak pay laeng,
agsursuratakon ket adda metten naipablaakko a sarita iti Bannawag.
Ngem iti panaggianko iti Quirino, ditoy nga ad-adda a rimmamut ken
nagrangpaya ti kinamannuratko. Diak ilibak a nagtaud dagiti idea ti
kaadduan a naputarko a sarita iti daytoy naseksek a lugar.

Maikadua ken naipangruna, ditoy a
nasirpatko ti babai a nagbalin a kasimpungalak iti biag.

Agbasbasa idi iti kinamaestra ni
Rose (Allibang) iti Baguio Colleges Foundation idi napili a maysa a
kandidata iti panagpiesta ti Legleg (Poblasion). Iti Disiembre 8,
selebrasion ti Inmakulada, ti piesta ti Quirino.

Maysa kadagiti prinsesa a
makoronaan ni Rose.

Idi damok a makita, nakunak iti
bagik: nakitakon ti babai nga isaklangko iti altar.

Ngem nagtalinaed dayta a palimed
iti kaunggak agsipud ta maestra ti (daydi) inana a kaduami iti
Namitpit Elementary School ken asideg a kabagian daydi Manong Baring,
ti pannaka-head teacher iti pagadalan a pagisursuruak. Mabainak
kadakuada amangan no ipagarupda a gungundawayak ti kinadekketko
kadakuada tapno mayasidegak ken ni Rose.

Pagbiit laeng ti bakasion ni Rose
iti Namitpit ket agsubli met laeng iti Baguio. Ngem bayat ti kaaddana
iti Namitpit, nagpaspasiarak iti balayda no makaiwakasak iti eskuela.
Pasaray makipanganak payen iti balayda.

Makaawat met ni Nana Gamay, ti
baket a paggigianak, ket saannakon nga umay sukonen no kasdiay a
maammuanna a nagpasiarak ken ni Rose. Ammona lattan a marabianak nga
aggawid ket ikabilna ti pagsaingan iti ngatuen ti agdan tapno adda
silawko a sumrek iti inaladan.

Nakunana iti naminsan: “Mislo,
mayatak no ni Rose ti asawaem. Nasayaat nga ubing. Nasayaat ti
pamilia a naggapuanna. Agbalinto a nasayaat nga asawa.”

Baka saannak
a maikari kenkuana, Nana,” pinangtingitingko iti baket.

Kasano a
maammuam no dimo ibaga ti riknam?” nakunana. “No adda riknam
kenkuana, ibagamon. Dimo palusposan ti gundaway no dumteng a kas
ita.”

Diakto malipatan dayta nga
imbalikas ti maysa a baket a saan a nakaadal, ngem nakaullom kadagiti
sursuro, leksion, padas ken pampanunot iti aktual a pagadalan ti
biag.

Uray ni Manong Baring, umisem-isem
no kua wenno kudkodenna laengen ti ulona no kasdiay nga imbes nga
agderetsoak iti Home Economics building a paggiananda kas
nakairuamak, sabalin ti maturongko.

Ngem iti naminsan a
panagpatpatangmi bayat ti panangsangomi iti maysa a bote ti arak,
imparipiripna nga awan ti pagkedkedanna no bilang agaremak ken ni
Rose ngem ti laeng dawatenna, saanko a pagay-ayaman, a kas iti
mapalpaliiwna a mapaspasamak no maysa a taga-patad ti agayat iti
maysa a taga-bantay.

Kinuna ni Manong Baring nga uray
taga-banbantayda laeng, saan a barengbareng ti ayat, no di ket maysa
a nasagraduan a banag a tagipatgen ken saluadan.

Diakto
tulawan dayta a panagtalekmo kaniak, Manong,” impasingkedko
kenkuana. Nakariknaak iti panagraem iti kinawada ti
panagpampanunotna.

Kalpasan ti makalawas, agsublin ni
Rose iti Baguio. Kaduana ti inana iti sango. Naisem a nagpayapay idi
lumabas ti luganda iti nagatep iti nipa a kuartok. Nagpayapayak met
ngem apagbingngi laeng ti insubadko nga isem. Iti dayta a kanito,
akuek nga iti ipapan ni Rose iti siudad, kuyogna metten ti pusok.

Ngem iti dayta a nasapa a malem,
simmangpet kadakami ti nadagem a damag: naikaranukon ti nagluganan da
Rose iti derraas!

(Adda
tuloyna)