: PITIK: Taldiap-Napalabas - 6 (Tuloyna) | Tawid News Magazine - Weekly Ilocos News 📰

PITIK: Taldiap-Napalabas – 6 (Tuloyna)

Wen, ditoy Quirino ti nakaramanak iti natalna ken nasimbeng a panagpampanunot iti baet ti kinasimple ti panagbiag dagiti agindeg. Nananamko ditoy ti sinsero a pannakilangen dagiti tattao, saan a kas iti baba a ti kaarrubam ti umuna a mangipababa kenka aglalo no nakapusta ti panagdur-asna iti biag. Taga-bambantayda a makuna ngem no dadduma, iti pay maysa a taga-sulsulinek a lugar ti pakasarakam iti kinamanagdayaw ken kinapakumbaba a diak unay marikna kadagiti kailiak iti baba.
Kinapudnona, naawis pay ketdin ti riknak nga agtalinaed nga agisuro iti mabayag a tiempo iti daytoy a lugar gapu ta ditoy ti nakaramanak iti kamarisan a paset ti panagbiagko.
Kangrunaanna, ditoy a nasirpatko ti babai a namagpitik iti pusok.
Mapnekakon no dadduma iti agdama a biagko. Nakunak iti bagik a mabalin a ditoyen ti pangbangonak iti bukodko a pamilia.
Ngem kayarigak iti naipit iti nagbaetan ti dua a bato. Iti maysa a bangir, nasarakakon ti babai nga idatagko iti altar ken agbalin nga ina dagiti annakko. Apaman nga agturpos ni Rose, masinunuok a maawat a dagus a mangisuro ditoy ilina. Natalgedto ti pamilia a bangonenmi ta duakami nga agsueldo.
Ngem iti sabali a bangir, kasanon ti arapaapko a ngumato iti posision iti inkeddengko a panawen? Ammok a no mangasawaak, awanton ti panawenko nga agbasa iti masteral, instrumentokto a ngumato iti puesto.
Kayarigak iti adda iti nagsapalan a dalan. Ania ti dalan a surotek?
Simngat ti dua a pasamak a nangbalangan iti aniaman a direksion a surotek.
Immuna, naaksidente da Rose ken ti inana idi agsublida iti Baguio. Gapu iti daytoy, nayospital ken nagbakasion tapno agpaungar. Iti dayta a situasionna, kinutimko pay la ti riknak. Diak kayat a gundawayan ti kinalupoyna iti tiempo a kasapulanna ti pannarabay. Kayatko a ti ayatna ket kas iti sabong nga agukrad iti kaltaang ti rabii tapno nawaya nga agkan ti pul-oy ken koronaan dagiti linnaaw.
Maikadua, naterminaran ti serbisiok. Manipud iti provisional nga appointment, nagbalin ti posisionko a provisional emergency. Kas panagawatko, iti provisional appointment, makatawen laeng ti serbisiok ket materminarannak iti panagserra ti klase. Ngem iti sumuno a panagbasa, maikkannak manen iti makatawen a panagserbi.
Ngem, naammuak iti superbisormi nga adda kinasukotko iti puestok. Duakami iti maymaysa a puesto.
No kasano a napasamak dayta ti dakkel a misterio. Ngem kaniak a biang, pammaneknek daytoy iti korapsion iti dibision. Nailako ti puestok iti sabali a tao.
Iti daydi a darikmat, diak ammo ti aramidek. Ti klasek ti pampanunotek. Dua laengen a bulan ket agturposdanton. No agsardengak nga agisuro, maapektaran la ketdi ti panagklaseda. Ngem no ituloyko ti agisuro, gratis ti serbisiok ta saanak metten nga agsueldo.
Bimmabaak ket napanak iti division office. Napanko kinita ti plantilla officer tapno ammuek no apay nga adda kinasukotko iti puesto. Ngem naammuak a manmanon nga umammingaw ti plantilla officer iti opisina. Naammuak pay nga iti panagtugaw ti kabarbaro a superintendente, inrusatna ti maysa a panagpalutpot gapu kadagiti naal-alimadamadna nga anomalia iti opisina.
Imbagak ti problemak iti ulitegko ket nagpakuyogak kenkuana a mapan iti balay ti plantilla officer. Nangala ti ulitegko iti dua a kaanakanna.
Idi agsasangokamin iti beranda ti balay ti plantilla officer, dinamagko no apay nga adda kinasukotko iti puestona. Saan nga agsusurot dagiti palawagna.
Impakpakaasi ti plantilla officer a sukatanna iti sabali nga item ti puestok iti sumuno a panaglulukat.
Imballaagko kenkuana nga iremediona uray substitute ti posisionko tapno mapagturposko met laeng ti klasek ta no saan, agtestigoak maikontra kenkuana.
Naibirokannak iti substitute position ti plantilla officer. Dagus met a nagsubliak iti Quirino.
Iti nasurok dua a bulan a panagisurok kadagiti agturpos nga ubbingko, siak laeng ti makaammo a substitute laeng ti nagbalinak. Ti ammo dagiti padak a mangisursuro, awanen ti problemak.
Uray ni Rose, diak impalgak a materminarak iti panagseserra ti klase. Sako la impalgak idi agrubbuaten ti lugan a posible a diakton agsubli pay iti Quirino iti sumuno a panaglulukat ta awan metten ti puestok a subliak.
Diak ammo no ania ti immapay a rikna ni Rose iti dayta a darikmat. Ngem ammok, kas kaniak, tinagisaemna met ti panagpakadak iti sanguanan ti posibilidad nga agtunged metten ti mabukbukel a riknami iti tunggal maysa iti dayta a malem a panagrubbuaten ti luganko tapno aggawidakon iti ili a naggapuak.
(Adda tuloyna)