: PITIK: Taldiap-Napalabas - 7 (Tuloyna) | Tawid News Magazine - Weekly Ilocos News 📰

PITIK: Taldiap-Napalabas – 7 (Tuloyna)

Adda panawen iti biag ti maysa a tao a masarakanna ti bagina nga agtakder iti nagsangaan ti biag ket kasapulan nga agikeddeng no ania a direksion ti surotenna.

Kas nadakamatko iti immun-una a paset daytoy a salaysay, inikkak ti bagik iti duapulo a tawen a manggun-od iti arapaapko a nangato a posision iti departamento ti edukasion: agbalin a maysa a superbisor iti distrito wenno superbisor iti dibision. Iti bukodko a kalkulasion, iti dayta a panawen, makaturposak iti masteral ken posible pay a doctoral iti las-ud ti sangapulo a tawen, agbalinak a head teacher ken prinsipal ket sakbay ti pannakaungpot ti 20 a tawen, superbisorakon.

Iti biangko, saan a dakes ti agarapaap. Ania ti kaes-eskan ti biag no awan ti arapaapmo a tun-oyen? No awan ti arapaapmo, kayarigam ti bulong nga idaknir ti angin iti no sadino a lugar agingga iti agrupsa lattan ken agbalin a daga iti maysa a suli. Ti arapaap ti sabong a nagtubo iti ngarab ti rangkis ket no seknanka iti buteng a kumarab-as iti bakras tapno purosem, agpatinggaka lattan a mangdaydayaw iti kinapintasna ngem saanmo a pulos a maaprosan.

Saan a dakes ti mangsurot iti desdes uray kasano katadem dagiti nagrungarong a bato ken katarumamis dagiti naibalangan a siit no masarkedam dagitoy babaen ti determinasion ken tured-pakinakem ket magtengmo ti ungto a nakaimuntaran ti arapaapmo a naranraniag a masakbayan.

Nasarakak ti bagik iti nagsangaan ti dalan ti biagko, lima a tawen manipud daydi damok a panangisuro iti Quirino, Ilocos Sur.

Bayat ti panagmattiderko iti nagsanga a dalan, sineknannak iti alindua no ania ti surotek a direksion. Agpakannawanak wenno agpakannigidak? Iti ayat wenno iti propesion?

Kas nadakamatko iti napalabas a paset daytoy a salaysay, naterminaran ti serbisiok bayat ti panagisurok iti Namitpit, Quirino, Ilocos Sur. Nakapagsubliak laeng a nangisuro ngem kas substitute iti dua a bulan agingga iti panagturpos dagiti adalak.

Iti dayta a kalgaw, inasikasok ti pannakaalak iti item tapno makaisuroak iti sumuno a panaglulukat. Dandani nagbalinak a bumalay iti division office ken arkos iti district office gapu iti panangsursurotko iti aplikasionko.

Pagsayaatanna, ta naruk-atan iti apagtapog ti Hunio ti resulta ti eksamen para kadagiti mangisursuro ket siak ti maysa kadagiti napagasatan a nakaruar.

Adu a kabaddungalak nga adda iti serbisio ti saan a nakaruar iti eksamen. Naikkatda iti puestoda. Ti nakas-ang, ti pay met ngarud puesto ti maysa a nasinged a gayyemko ti naited a puestok. Maladingitannak iti napasamak ngem awan ti mabalinko. Maysa met a kabakiran ti lubong ti edukasion a dagiti laeng napigsa ti rumabaw ket maiwalin dagiti nakapsut ken awan ti baelna.

Ditoy Vigan ti dagus a nakaidestinuak. Saannak a pinalusposan ti superintendente a maiyadayo agsipud ta mabalin a nakitana a dakkel ti maitulongko iti opisinana. Nalaingak nga agmakinilia ken agaramid iti report ken correspondence gapu ta nagadalak iti maysa a secretarial school iti Manila.

Bayat ti panagur-urayko iti bakante nga item, tumultulongak idi iti maysa a division supervisor nga agaramid iti reportna. Siak ti mangidalus iti reportna. Isu ti nagbalin a kasla mammabaga kaniak iti panagaplikarko a mangisuro. Inrekomendanak iti superintendente nga agimakinilia kadagiti reportna. Dayta ti nakaiyasidegak iti superintendente. Ket idi nakaruarak iti eksamen, siak ti maysa a dagus nga impuestona. Kas subad ti pannakaipuestok, sumagmamano a lawas sakbay ti panaglulukat ti klase, siak ti nagimakinilia kadagiti appointment papers ken advice dagiti maipuesto a mangisursuro nga ikuyogda iti panagreportda iti distrito a pakaidestinuanda.

Awan koman ti problemak ta addan natalged a pagsapulak. Iti panunotko, awanen ti lapped tapno saanko a magun-od ti arapaapko.

Iti dayta a panaglulukat ti Saturday classes, nagtulagkami iti maysa a gayyemko a padak a baro pay nga agbasa iti siudad ti Baguio.

Agrubbuatkami iti Vigan iti alas kuatro ti parbangon ti Sabado ket mapankami agklase manipud iti alas dies agingga iti alas singko. Agsublikami met laeng iti Vigan iti alas sais iti sardam.

Iti sumagmamano a Sabado, nagkuykuyogkami iti gayyemko a mapan agbasa iti masteralmi. Ngem di nagbayag, sabalin a direksion ti naturongko: saan a ti pagadalan no di ti kasera ni Rose, ti babai a namagpitik iti pusok. Agbasbasa manen iti Baguio Colleges Foundation kalpasan a nakaungar iti daydi pannakaaksidentena.

Ditoy a natakuatak a kasla gayam layap ti arapaap a natiliw ti matak ti pannakaibiatna iti law-ang ngem iti apagbiit a panagkiremko, nagpukawen iti imatangko.

Iti nagsangaan ti dalan, dua a direksion ti tinimbangko: ti arapaapko a nangato a propesion wenno ayat.

Pinilik ti ayat. Inwalinko ti arapaapko. Ngem iti daytoy a panangpilik iti ayat, awan a simnek kaniak a panagbabawi. Nabatad a maibagak a saannak a nagbiddut iti dalan a sinurotko.#