PITIK: Tarigagay nga Agbiag -2

Iti sabali a bangir, naminsan pay nga impakita ni Pinoy ti sabali a kita ti kinataona iti pannakakulong dagiti minero iti pagminasan iti Itogon, Benguet.

Daytoy a sangkapirgis a kinataona ti masansan a pakaisagmakan ni Pinoy iti peggad wenno patay ken mangmanmantsa  iti imahena iti sabali a pagilian.

Kitaentayo daytoy.

Daan a tunnel ti pagminasan a nakakubongan dagiti 16 a minero. Saanen nga ar-aramaten ti kompania ti minas ket pinanawannan. Nupay kasta, nangikabil iti guardia iti wangawangan ti tunnel tapno awan ti makastrek. Adda ngamin dagiti sukir nga agindeg a nalimed a sumrek ditoy tapno agmarutmot kadagiti naminas a balitok.

Karaman dagiti nadakamat a minero kadagiti masansan a sumrek iti tunnel tapno agminas. Ngem saan a nadlaw ti guardia iti wangawangan ti tunnel ta nangaramidda iti sabali nga abut a kumamang iti tunnel. Ditoy ti sumrekan ken rummuaranda.

Segun iti maysa nga opisial ti kompania ti minas a nangpanawen iti nasao a tunnel, awan ti pammalubosda nga agminas dagiti nasao a minero iti daan a tunnel. Iti ababa a pannao, illegal nga agminminas dagitoy iti tunnel iti laksid ti pannakaammo ti kompania ti minas.

Impalgak ti maysa kadagiti naisalakan a minero a masansan a sumrekda iti tunnel uray ti panawen ti matutudo wenno iti bagyo.

Iti dayta nga aldaw, Septiembre 22, simrek latta dagiti 16 a minero iti tunnel nupay ammoda nga adda sumangbay a bagyo.

Addadan iti uneg idi kellaat a simrek ti dakkel a bagi ti danum. Tapno dida malapunos, kimmalipkipda iti nangatngato a paset. Ditoy ti naggiananda agingga iti simmangpet ti arayat.

Ketdi, nupay addada iti sanguanan ti peggad, saanda a napukawan iti namnama. Ammoda a dumteng ti arayat. Ngem dida ninamnama nga aglabas ti makalawas sakbay a maisalakanda.

Kadagiti naisalakan, baro a biag. Kadagiti kakaduada a di nakalasat, maysa a dakkel a trahedia.

Iti daytoy a pasamak, limtuad a naisaguday ken ni Pinoy ti sabali a klase ti “kinasalukagna” iti tarigagayna nga agbiag. Basta panguartaan, uray iti babaen ti illegal a wagas, ipakat latta ni Pinoy daytoy negatibo a “kinasalukagna”.

Kas kadagiti 16 a minero a nakubong, ammoda la ngaruden a maiparit ti mapan agminas iti daan a tunnel, impamuspusanda latta ti makastrek iti pagminasan a saan a makadlaw ti guardia. Ammoda nga illegal ti iseserrekda iti nasao a pagminasan ngem induron ida ti tarigagayda nga agbiag uray iti babaen ti maikaniwas a wagas.

Posible nga iti panagminasda iti tunnel, adu latta ti mamarutmotda a balitok nga ilakoda ken dakkel a makatulong iti  pagbiagda. No awan ti dakkel a madilamutda iti pagminasan, dimo namnamaen nga agkarasubli dagitoy a minero.

Iti ababa a pannao, nagbiagda babaen ti sikap. Ngem nagpulloda gapu iti sikap.

Daytoy met la ti gapuna nga adda dagiti Pinoy a maipadamag a nairaman a biktima iti panagbomba wenno hijack kadagiti ganggannaet a pagilian kas iti Iraq, Lebanon ken dadduma pay a nariribuk a pagilian.  Kaadduan kadagitoy a Pinoy ti simrek iti sabali a pagilian iti laksid ti pannakaammo ti gobierno.

Kas ti maysa nga am-ammomi a mapan mangged iti Spain. Ammona nga illegal ti iseserrekna iti daytoy a pagilian ta awan ti working visana no di laeng kas turista. Ngem desidido nga agtrabaho iti abroad uray no illegal ti iseserrena.

Nadamagko a bimmaba iti maysa a disso iti Germany, nailuganda iti maysa a van ket pimmuslitda iti beddeng ti Spain. Ngem nasalaw ida dagiti frontier guard. Naibalud ti kasinsinko. Kalpasan ti makabulan, naipasubli ditoy naggapuanna.

Pinadasna ti sinisikap nga iseserrek iti sabali a pagilian ngem dina nailasat. Nagasat ta naibalud laeng iti makabulan  sa naipalladaw nga undesirable alien. Dagiti dadduma, nalungsotda iti pagbaludan.

Kasta met dagiti di ammo ti bilangna a Pinoy nga agtrabtrabaho iti Iraq nupay iparit ti gobiernotayo gapu iti riribuk sadiay. Sikap met ti nakastrekanda iti nasao a pagilian.

Iti panagbiaheda, nakalanad iti pasaporteda a sabali a pagilian ti papananda. Ngem bumabada iti beddeng, agluganda iti bus wenno ania ditan a sasakayan sada sumrek iti Iraq.

Santo laengen maammuan ti kaaddada iti nasao a pagilian no adda mapasamak a dakes kadakuada agsipud ta karamanda a biktima iti panagbomba wenno hijack.#