PITIK: Tarigagay nga agbiag

Maysa a paset ti kinatao ni Pinoy ti limtuad wenno nalukaisan iti pannakakubong ti 16 a minero iti maysa a nagpanawan a pagminasan iti Itogon, Benguet.

Idi Septiembre 22, simrek dagitoy a minero iti pagminasan iti baet a simmiplagen ni Bagyo Nina iti Amianan a Luzon a pakairamanan ti Benguet.

Iti pannarita ti maysa a nakalasat, dida pay nagbayag iti tunnel idi kellaat a nagdarison ti dakkel a bagi ti danum ket makarkarattotda a nagpakni iti nangatngato a paset tapno saanda a malapunos wenno maiyanud.

Ditoy a pinaneknekan ni Pinoy nga iti sanguanan ti peggad, kupikopna ti tarigagay nga agbiag ket daytoy ti mangiyaon kenkuana iti ngiwat ti panungpalan.

Idi nagsiwarak ti damag a 16 a minero ti nakubong iti pagminasan, naituon ti imatang ti pagilian, ken uray ti sangalubongan, iti pannakigubal ken pannakikinnamat dagiti boluntario a rescuers iti oras para iti pannakaispal dagiti nakubong a minero.

Oras ti kangrunaan a kabusor dagiti rescuers – iti panagtaray dagiti darikmat, ammoda a bumasbassit ti tiansa a maisalakan dagiti nakubong a minero.

Sabali pay a problema dagiti rescuers ti nakisang a ramit nga usarenda iti iseserrekda iti tunnel a namnamaenda a nagpaknian dagiti minero.

Kinapudnona, iti maikapat nga aldaw, napukawen ti namnama ti sumagmamano nga opisial ti minasan nga adda pay maalaw a biag iti tunnel gapu iti nakiddit nga oksiheno nga angsen, kaawan ti pamedpedda iti bisin ken waw ken iti posible a pannakalapunosen ti tunnel iti danum.

Ngem saan a nagbaliw ti pinget dagiti rescuers, ken impustada pati biagda nupay bumasbassit ti rissik ni namnama nga adda pay madatnganda a biag iti tunnel.

Ket nagbunga dayta a pingetda.

Iti maikapito nga aldaw, nasarakanda ti maysa a minero a sibibiag pay, simmaruno ti sabali ket iti sumuno nga aldaw, uppat pay a minero ti naiyaonda iti tunnel.

Iti pakabuklan, siam ti naisalakan a minero idinto nga innem ti nasarakan a bangkayen.

Maysa a minero, ni Joseph Anayasan, ti nasarakan a sibibiag ngem idi sublien dagiti rescuers, awan metten. Iti pannakaisurat daytoy, di pay nabirokan ni Anayasan, no sibibiag pay wenno naiyanud.

Ngem kuna dagiti rescuers nga isardengdan ti agsapul itay Huebes, Oktubre 2.

Agkakaarngi ti sungbat dagiti naisalakan. Idi agdinakkel ti sumrek a danum iti tunnel, kimmalabkabda iti nangatngato a lugar ket ditoy ti nagtalinaedanda agingga a dimteng iti arayat.

Segun iti maysa naispal, inin-inutna a nginalngal pati garter ti sapinna tapno laeng adda pamedpedna iti bisin.

Kinuna met ti sabali a danum manipud iti agtedted a diding ti tunnel ti nangep-ep iti wawna.

Iti sabali a bangir, kararag ti nagtaklinan ti maysa a minero bayat ti panagurayna iti arayat.

Naminsan pay a pinaneknekan ni Pinoy nga uray adda iti wangawangan ni Patay, dina itulok a maparmek ti tarigagayna nga agbiag.

Daytoy a kinapinget ni Pinoy ti mangitagtag-ay kenkuana tapno makaaddang uray arig dinan maalut-ot dagiti sakana iti gungugong ti pannakapaay, trahedia wenno panungpalan.

Kas daydi trahedia a nangdalupo iti Siudad ti Baguio idi dinuprak ti napigsa a ginggined, nagsiddaawan ti sangalubongan dagiti kailian a nasarakan dagiti rescuers a sibibiag pay idinto a nasuroken a dua a lawas a nagaburanda kadagiti rebba ken awan a pulos ti naipapaunegda ngem pinatibker ida ti tarigagayda nga agbiag.

Milagro, kuna ti sangalubongan.

Ngem ken ni Pinoy, naibinggas daytoy iti kinataona a tumakder ken kumalay-at manipud iti ngarab ti peggad, trahedia wenno patay!