Plano ti DoF a single tax system para tabako, binabalaw ti dati a House deputy speaker

(Karaman ti report ni Danny Antalan)

SAN EMILIO, Ilocos Sur – Binabalaw ti dati a House deputy speaker ti plano a pannakaipakat ti unitary wenno single tax system para iti tabako agsipud ta pukawenna ti industria ti tabako ditoy Kailokuan.

Daytoy ti bugas ti panagsarita ni dati a House Deputy Speaker Eric Singson Sr. iti sanguanan dagiti residente  ditoy nga ili a kaadduanna ti mannalon.

Kinuna ni Singson a no agbalin a linteg ti HB 5727,  maingato iti 1,000 porsiento ti buis iti produkto ti tabako manipud iti reject agingga iti class DE.

“Daytoy ti saantayo a maakseptar agsipud ta daytoy ti mangpatay iti industriatayo ti tabako,” kinuna ni Singson.

Ni Diputado Joseph Emilio Abaya ti otor ti House Bill 5727 wenno sin tax reform bill para iti tabako ken produkto ti alkohol,   kas maiyannurot iti plano ti Department of Finance a mangipakat iti unitary wenno single tax system para iti produkto a tabako ken alcohol kas maysa kadagiti measures a pagpastrekan ti gobierno.

Ti probinsia ti Ilocos Sur ti kangrunaan nga agmulmula iti tabako a pakaibilangan ti Ilocos Norte, Abra, La Union, ken Pangasinan.

No maipakat ti single tax system iti tabako, maymaysanton ti buis a maipataw kadagiti imported ken nangina a sigarilio ken dagiti nalaka a klase ti sigarilio a partuat ditoy pagilian.

Kinuna ni Singson a no maipakat daytoy single tax system, matay metten ti industria ti tabako agsipud ta awanton ti gumatang iti reject ken uray ti Class DE agsipud ta dagitinto laengen nasayaat ti klaseda a bulong ti tabako ti gatangen dagiti agparpartuat iti sigarilio.

Idi napan a bulan, nagrali dagiti nadumaduma a grupo dagiti mannalon iti sanguanan ti provincial capitol babaen ti panangidaulo da dati a Mayor ti San Juan Ben Sarmiento ken ni Konsehal ti Sinait Bernard Vicente tapno protestaanda iti House Bill 5727.

Kinuna ni Sarmiento a no pumasa ti nasao a gakat, pumataston ti presio ti lokal a sigarilio kadagiti imported wenno nangina a sigarilio.

Kinuna ti dati a mayor a no mapasamak daytoy, awanton ti gumatang iti lokal a sigarilio.

Kinuna met  ni Vicente a dakkel ti epekto daytoy kayat nga ipakat ti DoF a unitary tax system kadagiti agmulmula iti tabako agsipud ta awanton ti gumatang iti produktoda a tabako no nanginan ti sigarilio.

Kabayatanna, indagadag ni House Minority Leader Danilo Suarez ti pannakaipaay ti naing-inget a panangadal iti epekto ti pannakaingato iti buis kadagiti sigarilio ken arak kadagiti agmulmula iti tabako ken unas.

Iti sabali a bangir, kinuna met ni Prof. Leonor Briones ti University of the Philippines nga iprioridad koma ti agdama nga administrasion ti problema dagiti mannalon a maapektaran iti pannakaipasa ti nasao a gakat.

“Kasapulantayo dagiti gakat a pagpastrekantayo  ngem kasapulan met a manganda (mannalon a maapektaran),” kinuna ni Briones.#