Footer

Planta, nakasaganan nga aggatang nakaambuligan a mais

BANTAY, Ilocos Sur – Saanton a parikut dagiti mannalon ti panagbilag ken pannakapusi dagiti apitda a mais agsipud ta addan planta nga aggatang iti sigugomi wenno nakaambuligan a mais.

Daytoy ti impasingked ni Cong. Ronald Singson kalpasan ti pormal a pannakailukat ti Corn Post Harvest Processing and Trading Center a masarakan iti Bulag East, ditoy nga ili idi Pebrero 3.

Segun ken ni Cong. Ronald Singson, aganay a P35 milion ti nagastos iti pannakaipasdek ti pasilidad babaen ti National Agribusiness Corp. wenno NABCOR ken ti pribado a kompania a “Save Wise”.

“No maabrotdanton ti nausarda ditoy, ibatidanton ken iyawatda iti probinsia daytoy a pasdek. Ngarud, kasapulan nga allukoyentayo dagiti mannalon tapno usarenda ti pasilidad ken mapadasanda dagiti benepisio manipud itoy a pasdek,” kinuna ti diputado idinto nga impasiguradona a maala a dagus dagiti mannalon ti bayad ti ilakoda a mais.

Maysa a parikut dagiti mannalon iti mais ti panagbilag ken pannakapusi dagiti mulada a mais kalpasan ti panagapit. Ngem iti pannakaipasdek ti planta, apaman a malpas ti panagburasda, mabalindan nga ideretso iti planta dagiti apitda ket ditoyen a mapamaga ken mapusi.

Addaan ti planta iti pasilidad nga uppat a cobber dryer a makalaon iti 50 metriko tonelada tunggal maysa, ket ditoy a mapamaga dagiti mais sakbay a maipan iti grain drier tapno maipababa iti 14% ti moisture sakbay a mapusi ken maipan iti bagging bin. Kalpasanna, nakasaganan daytoy a mailako kadagiti feed millers.

Kabayatanna, kinuna ni Michael Mariano, plant manager, a nakasaganan ti planta nga aggatang kadagiti nakaambuligan a yellow corn nga apit dagiti mannalon iti umuna a distrito ti probinsia.

Segun ken ni Mariano, gatangenda dagiti physically matured a yellow corn nga addaan iti 30% a moisture content.

Kinuna ni Mariano a mangtedda iti P.20 nga insentibo kadagiti mannalon no aglakoda iti planta isu a P5.20-P5.30 kada kilo ti presio ti sangaambuligan a mais.

Innayonna nga isuda ti makaammo a mangted iti sako ken mangpick-up kadagiti maburas a mais a mangipan iti planta.

Kinuna met ni Elio Vivit, mannalon a taga-Refaro, San Juan, a dakkel a pakalag-ananda ti pannakaipasdek ti pasilidad ta bumassiten ti trabahoda ken bumassiten ti panawenda a mangpamaga kadagiti apitda a mais.

“Bareng napintas ti presioda ket maawan metten dagiti traders a manglaklaka iti produktomi,” kinuna ni Vivit.#