BANNER: Planta nga agproseso iti minas, pinuoran armado a grupo.

QUIRINO, Ilocos Sur – Awan ti permiso daytoy a planta ditoy nga agproseso iti minas manipud kadagiti maseknan nga ahensia wenno iti lokal a gobierno ngem nangrugi latta ti operasionna.

Daytoy ti limtuad iti panagimbestiga dagiti polis mainaig iti pannakapuor dagiti ramit ken ekuipo ti maysa a planta sadiay Mt. Nakawkawa, Patiacan ditoy nga ili idi nariwet nga agsapa ti Hulio 23.

Segun iti report manipud iti police station ditoy, idi agarup 8:44 ti bigat ti nadakamat nga aldaw, nakaawatda iti tawag manipud iti selpon a naggapu ken ni Santos Bal-iyang, prinsipal ti Quirino National High School ken residente iti barangay Poblacion, nga adda naisayangkat a panagpuor sadiay Mt. Nakawkawa, Patiacan, partikular iti Carbon In-Pulp a kukua ti maysa a Leoniza Beligen y Bawingan, residente iti nadakamat a lugar.

Dagus a nagresponde dagiti polis agraman ni Mayor Allen Nimo, Jr. ket nagturongda iti nadakamat a lugar.

Kas maibasar iti inbestigasion, idi agarup 4:30 ti agsapa ti Hulio 23, rinaut  ti maysa a grupo a pakairamanan ti 8 a lalaki ken 5 a babai a nakaarmas iti M16 ken M14 ti nadakamat a planta sada inukkon dagiti 5 a trabahador iti nasao a planta a pakaibilangan da Dennis Quanzo y Fanglayan, 50, naasawaan, ken residente iti Lepanto, Mankayan, Benguet; Aligo Caslangen y Jaime, 52, baro, ken residente iti Patiacan, Quirino, Ilocos Sur; Anson Tayab y Farningan, 49, naasawaan, residente iti La Trinidad, Benguet; Junbert Zembrano y Ayangdan, 37, naasawaan, residente iti La Trinidad, Benguet; ken Danny Bakedan y Nena, 29, baro, ken residente iti Sagada, Mt Province.

Mapapati nga inyam-ammo ti armado a grupo a miembroda ti New People’s Army sada impakdaar a puoranda ti planta kas retaliation iti di panagtungpal ti akinkukua iti pammilinda nga isardengna ti operasion ti nasao a planta nga agproseso iti minas.

Karaman kadagiti pinuoran ti armado a grupo ti Carbon In-Pulp (CIP),  generator, 2 a copper pretention/tank,  4 nga acetylene tank, welding machine, compressor, blower, submersible pump ken awan naggianda a  gallon a mapattapatta nga agbalor amin iti maysa a milion a pisos.

Saan nga inan-ano ti grupo dagiti trabahador.

Segun kadagitoy, kalpasan ti panangpuor ti grupo kadagiti equipo ken ramit, pimmanawdan a nagturong iti amianan a direksion.

Iti maysa nga statement, impakdaar ti Antonio Licawen Front Operational Command a pinuoranda ti nadakamat a carbon-in-pulp plant gapu iti panagsalungasing daytoy iti linteg ti environment kas iti panagaramat iti napeggad a kemikal kas iti cyanide a makadadael iti salun-at ti tao, animal ken mulmula.

Saan laeng a daytoy ti panagpuor ti NPA iti ekuipo dagiti kompania ti minas.

Idi 2014, pinuoran dagiti kameng ti Alfredo Cesar Command ti drilling machine ti Freeport McMoran-Phelps Dodge Mining Company gapu iti mapapati a makadadael nga ekplorasion nga iwaywayatna.

Segun iti NPA, nabayagen a protprotestaran dagiti umili ti Quirino ti panagaramat iti cyanide iti panagproseso iti minas agsipud ta agop-operasion ti nasao a planta iti ngatuen ti pagtataudan ti inumen ti Barangay Patungcaleo.

Kinuna pay ti NPA a ti operasion ti CIP ti nakagapu iti panagpatay dagiti lames iti Balas-iyan river idi napalabas a tawen.

Kinuna ti grupo nga agbalin koma (panagpuor) a ballaag kadagiti dadduma nga operador iti Barangay Patiacan ken dadduma pay a lugar nga isardengda ti makadadael a wagas a panagminas idinto nga imballaagna a dina ipalubos ti aniaman nga aktibidad a makadadael unay iti aglawlaw ken iti salun-at dagiti komunidad.

Nupay kasta, kinuna ti grupo a palubosanda dagiti babassit a minero nga agminas iti balitok ken kobre no la ketdi ipasiguradoda ti pannakasalaknib ti aglawlaw, salun-at ken agrikultura.