Footer

Plantasion, rinaut ti Task Force Xmas, P12-M pategna a marihuana, napuoran

SUGPON, Ilocos Sur – Agdagup iti 60,000 a fully grown a mula ti marihuana ti pinag-ot ken pinuoran dagiti nagtipon a bunggoy ti Task Force Green X’mas kalpasan ti panangrautda iti tallo kadisso a plantasion iti Mount Capas, Barangay Caoayan, ditoy nga ili itay nabiit.


Mapattapatta nga aggatad iti P12 million dagiti pinag-ot ken pinuoran ti task force a mula a marihuana.
Kanaig daytoy, impaayan ni Police Chief Supt. Leopoldo Bataoil, PNP Regional Director, iti komendasion dagiti kameng iti nasao a task force a nangisayangkat iti operasion iti nasao a lugar.
Kinuna ni Bataoil a gapu iti panagballigi ti operasion, bumassit ti suplay ti illegal a droga iti rehion ken iti kabangibangna a probinsia.
Napag-ot dagiti mula a marihuana iti tallo a plantasion iti nagbedngan ti Ilocos Sur ken Benguet ket mapattapatta nga aglawa daytoy iti aganay 1.5 ektaria.
 Binukel ti Narvacan PNP, 104th Police Mobile Group, Sugpon PNP, Alilem PNP, PAIDSOTG ken ti Philippine Drug Enforcement Agency (PDEA) nga indauluan ni Police Chief Inspector Marlo Castillo ti Task Force Green X’mas.
Napuoran dagiti  mula a marihuana iti mismo a lugar a nakapag-otanda babaen ti superbision ni  Ilocos Sur Provincial Director Police Senior Supt.  George T. Regis.
Awan ti naaresto iti operasion gapu ta mapapati a nagtakias dagiti agtartaraken idi isayangkat ti task force ti panagraut iti plantasion.