Plantasion ti marihuana, rinaut dagiti polis

CERVANTES, Ilocos Sur – Rinaut itay nabiit dagiti nagtitipon a bunggoy dagiti polis ti maysa a plantasion a pakatartaripatuan dagiti mula a marihuana iti Sitio Yugok a masarakan pagbedngan ti Sitio Ili, Barangay Dinuede West, ditoy nga ili ket pinarut ken pinuoranda dagitoy .

Binukel ti PAIDSOTG, ISPIB, ISCIDT, ISPPSC, PDEA ROI, polis-Suyo ken polis Cervantes nga indauluan da P1 Apollo de Leon Calimlim, P1 Jaime Navarro Laguesma ken P1 Reynaldo Carrido Mendoza, Jr., ken babaen ti direct supervision ni Provincial Director Pol ice Senior Supt. Eduardo Angel Dopale ti raiding team a nangraut iti nasao a plantasion idi pasado alas dose ti malem ti Abril 13.

Pinarut ken pinuoran dagiti rimmaut nga operatiba ti 30,000 a fully grown a marihuana nga addaanen bukel dagiti sabongda a mapattapatta nga agpateg iti P6 milion ket nangisalogda laeng kas pammaneknek iti sumagmamano kareppet nga impanda iti Cervantes.

Sinaksian ti barangay captain ken dagiti tanod ti pannakapuor dagiti naparut a mula a marihuana.

Kabayatanna, napilaan iti panaglabsing iti RA 9165 ti maysa a baro gapu iti panagtarakenna iti mula a marihuana iti likudan ti balayna.

Napilaan iti City prosecutor’s office ni Dante Batao-el y Gao-ay, 30, baro, natibo ti Gregorio del Pilar ngem agdama nga agnaed iti Brgy. Oaig Daya, Candon City.

Nasukalan dagiti polis nga agtartaraken ni Batao-el iti tallo kapuon a marihuana iti likudan ti balayna nga agpateg iti P600.#